बेइजिङ । कोभिड–१९ को सङ्क्रमण भएका क्षेत्रबाट चीन आएका यात्रीमाथि प्रतिबन्ध लगाएर कोभिड–१९ महामारी फैलिन नदिन चीनको राजधानी बेइजिङले विभिन्न उपाय तय गरेको छ ।
ग्लोबल टाइम्सका अनुसार बेइजिङमा फर्कने योजना बनाएका मध्यम वा उच्च जोखिम भएका क्षेत्रका बासिन्दालाई हवाइ तथा रेलसेवाका लागि टिकट बिक्री तत्कालका लागि रोकिने छ । बेइजिङका अधिकारीले मध्यम र उच्च जोखिमयुक्त क्षेत्रमा रहेका मानिसका लागि स्वास्थ्य कोडलाई अझै जोखिमको क्षेत्र सङ्केत गर्ने पहेँलो रङमा राखिने छ ।
स्वास्थ्य सङ्केत हरियो भएका स्थानका मानिसले भने कुनै अवरोधबिना बेइजिङतर्फ जाने विमान वा रेलमा चढ्न दिइने छ । चीनका विभिन्न प्रान्त वा सहरबाट नै राजधानी बेइजिङ जान हरियो सङ्केत हुनुु जरुरी हुने छ ।
चीनका थुप्रै सहरमा पुनः कोभिड–१९ सङ्क्रमित भेटिन थालेपछि र उनीहरूमा समुदायबाटै सङ्क्रमण सरेको पुष्टि भएपछि चीनको राजधानीमा उच्च सतर्कताका लागि यो कदम चालिएको हो ।
चीनका १५ प्रान्त तथा नगरपालिकामा ५०० भन्दा बढी व्यक्तिमा डेल्टा भेरियन्ट को प्रभाव देखिएको छ ।
बेइजिङको ड्याक्सिङ अन्तर्राष्ट्रिय विमानस्थलले नान्जिङ, याङजाउ र झाङजियाजीजस्ता सङ्क्रमित भेटिएका र सङ्क्रमित रहेको १५ सहरबाट उडान भर्न रोक लगाएको घोषणा गरेको छ ।
विमानस्थलका उपमहाप्रबन्धक वेन वुले भन्नुभयो– ‘बेइजिङ ड्याक्सिङ अन्तर्राष्ट्रिय विमानस्थलले नान्जिङ, याङजाउ र झाङजियाजीजस्ता १५ सहरबाट उडानमार्गलाई अर्को सूचना जारी नहुँदासम्मका लागि निलम्बन गरेको छ । वुले उडानमा लगाइएको प्रतिबन्ध सङ्क्रमण बिस्तार नहोस भनेर गरिएको बताउनुभयो ।
यसैबिच, नयाँ कोभिड–१९ सङ्क्रमितको सङ्ख्या बढ्न थालेपछि बेइजिङ अन्तर्राष्ट्रिय फिल्म मेला स्थगित गरिएको स्पुतनिकले गत बिहिबारको घटनाको आधिकारिक बयान उद्धृत गर्दै रिपोर्ट गरेको छ ।
‘देशका धेरै क्षेत्रमा हालै महामारीको प्रकोपका कारण, सुरुमा अगस्त १४–२१ का लागि तय गरिएको एघारौँ बेइजिङ इन्टरनेसनल फिल्म फेस्टिभल सामान्य सुरक्षा र स्वास्थ्यका कारण स्थगित गरिनेछ’ मेला आयोजक समितिले जानकारी गराएको छ । तथापि, आयोजकले यो मेला कहिले हुने छ भन्नेबारे केही नबताएका स्पुतनिकले उल्लेख गरेको छ । (रासस/एएनआई)
