वासिङटन । अमेरिकाले इरानको नयाँ सरकारलाई परमाणु सम्झौतासम्बन्धी वार्तामा पुनः फर्कन आग्रह गरेको छ ।
इरानका नवनियुक्त राष्ट्रपति इब्राहिम रायसीले जिम्मेवारी ग्रहण गरेकै दिन बिहिबार अमेरिकाले परमाणु सम्झौताको विषयलाई सकारात्मक दिशातर्फ लैजान आग्रह गरेको हो ।
अमेरिकी विदेश मन्त्रालयका प्रवक्ताले कूटनीतिक वार्ताको अवसर सधैँ खुल्ला नरहने समेत स्मरण गराउनुभएको छ ।
सन् २०१५ मा इरान र अन्य छ देश अमेरिका, बेलायत, फ्रान्स, चीन, रुस र जर्मनीबिच भएको एउटा सम्झौतानुसार इरानलाई आर्थिक क्षति पुग्ने केही प्रतिबन्ध हटाइएको बदलामा इरानले आफ्ना केही परमाणु कार्यक्रम रोकेको थियो । अहिले फेरि त्यसलाई निरन्तरता दिन अमेरिकाले इरानलाई आग्रह गरेको हो ।
बिहिबार पद सम्हालेपछि इरानी राष्ट्रपति रायसीले पनि देशमाथि लागेका प्रतिबन्ध अन्त्यका लागि गरिने कूटनीतिक पहललाई समर्थन गर्ने आसय व्यक्त गर्नुभएको थियो ।
इरानका नयाँ राष्ट्रपतिको आसय र अमेरिकाको आग्रह मिल्दोजुल्दो भएकाले दुई देशको सम्बन्ध सकारात्मक दिशातर्फ उन्मुख हुन सक्ने अपेक्षा गरिएको छ ।
यसअघि सन् २०१८ मा तत्कालीन अमेरिकी राष्ट्रपति डोनाल्ड ट्रम्पले परमाणु सम्झौताबाट अमेरिकालाई अलग्याउँदै इरानमाथि पुराना प्रतिबन्धलाई निरन्तरता दिनुभएको थियो ।
पश्चिमा देशले इरानमाथि परमाणु हतियार बनाउन लागिरहेको आरोप लगाउने गरेका छन् भने इरानले त्यसलाई अस्वीकार गर्दै आएको छ ।
इरानी नयाँ राष्ट्रपति रायसीले इरानमाथिका प्रतिबन्ध अन्त्य गर्ने कुनै पनि कूटनीतिक प्रयास आफूले गर्ने बताउनुभएको थियो । सम्बन्ध सुधार गर्न र सम्झौतालाई पुनर्जीवित गर्न अस्ट्रियाको राजधानी भियनामा केही समयदेखि वार्ता भइरहे पनि नतिजा आउन सकेको छैन । (रासस/सिन्हवा)
