चन्द्रप्रसाद पौडेल, (भारत) ।।
रोजगारीका दौरानमा तामिलनाडुको कोयम्बटोरमा पुगी निधन भएका नेपाली श्रमिकको मूल प्रवाह अखिल भारत नेपाली एकता समाजले दाहसंस्कार गरेको छ ।
प्युठान स्वर्गद्वारी नगरपालिका–९ निवासी हस्तबहादुर बैजाली मगरका ४६ वर्षीय छोरा केशवराज बैजाली मगरको मूल प्रवाहले अगस्त ५, २०२१ का दिन दाहसंस्कार गरेको हो ।
उनी रोजगारीको सिलसिलामा स्वदेशबाट अगस्त १ का दिन गोन्डाबाट रेल चढी अगस्त ३ का दिन कोयम्बतुर पुगेका थिए । केशवराजको साथमै रहेका रेशम थापा र गेगराज थापासँग कोयम्बतुर रेलवे स्टेसनको प्लेटफार्मबाट बाहिर निस्किने क्रममा चक्कर लाग्यो भनेको बताए । कोयम्बतुर नगर समितिका उपाध्यक्ष रेशम थापा र उहाँका छोरा गेगराज थापाले पानी खुवाउँदा–ख्वाउँदै उहाँकै काखमा निधन भएको रेशम थापाले जानकारी गराउनुभयो ।
घटनाको जानकारी रेलवे पुलिस थानामा जानकारी गराएपछि चेकजाँच गर्दा मृत्यु भएको पुष्टि भएपछि मृतक केशवराजको पार्थिव शरीर कोयम्बतुरको सरकारी अस्पतालमा राखिएको थियो ।
उक्त जानकारी उहाँको परिवारलाई गराएपछि रेशम थापा कोयम्बतुरको लागि हिँडेका थिए । अगस्त ५ का दिन मृतकका आफन्तहरू कोयम्बटोर पुगेपछि प्रशासनिक प्रक्रिया मिलाएर कोयम्बतुरस्थित आत्तुपालमको घाटमा दाहसंस्कार गरिएको हो ।
दाहसंस्कार स्थलमा मूल प्रवाह कोयम्बटोर नगर समितिले शोकसभा सम्पन्न गरेको थियो ।
मृतकका भाइ रमेश बैजाली मगरको अध्यक्षता र नगर सचिव चन्द्रप्रसाद पौडेलको सञ्चालनबाट अगाडि बढेको शोकसभामा मृतकको सम्झनामा एकमिनेट मौनधारण गरिएको थियो । शोकसभामा मूल प्रवाहका केन्द्रीय परिषद् सदस्य रविशङ्कर शर्मा, दक्षिण भारत क्षेत्रीय समितिका सदस्य नरेन्द्रकुमार नेपाली, कोयम्बटोर नगर उपाध्यक्ष रेशम थापा, इरोड नगर समितिका अध्यक्ष भीमलाल शर्मा, आफन्त लेखराज ठेडीमगर र पुनाराम ठेडीमगर लगायतले शोकमन्तव्य राख्नुभएको थियो ।
