काठमाडौं । २ नम्बर प्रदेशका भौतिक पूर्वाधार र विकासमन्त्री रामसरोज यादवले अदालतबाट कैद र जरिवाना भोगेका व्यक्तिलाई आफ्नो मन्त्रालयको सल्लाहकारमा नियुक्त गरेका छन् । मन्त्री यादवले विशेष अदालतबाट कैद सजाय भोगेका र नगद जरिवाना तिरेका जीवनाथ चौधरीलाई आफ्नो मन्त्रालयको सल्लाहकारमा नियुक्त गरेका हुन् ।
चौधरी चार महिना जेल सजाय भोगेका व्यक्ति हुन् । चौधरीले विशेष अदालतको फैसलाअनुरा पौने ७ लाख जरिवाना बुझाएका थिए ।
चौधरी तत्कालिन जिल्ला विकास धनुषाको लेखापालको रुपमा कार्यररत रहँदा भ्रष्टाचारमा मुछिएका थिए । उनको विरुद्धमा अख्तियार दुरुपयोग अनुसन्धान आयोगले मुद्दा दायर गरेकोे थियो । उनी अहिले पनि निलम्बनमा छन् । निलम्बनकै अवस्थामा र सर्वोच्चमा मुद्दा चलिरहेको व्यक्तिलाई मन्त्रालयको सल्लाहकारमा नियुक्त गरिनु अनैतिक कदम मानिन्छ ।
अदालतबाट दोषी ठहर भएको व्यक्तिलाई सल्लाहकारमा नियुक्त गरेपछि मन्त्री यादव विवादमा तानिएका छन् । चौधरीजस्तो विवादस्पद व्यक्तिलाइ प्रदेश सरकारकै विकास निर्माणसम्बन्धी महत्वपूर्ण मन्त्रालयको सल्लाहकारमा नियुक्ती दिनु अनैतिक एवम् गैरकानूनी भएको भन्दै कांग्रेसकै नेताहरू असन्तुष्ट बनेका छन् ।
