काठमाडौँ । विद्यालय व्यवस्थापन समितिको अध्यक्ष चयनको विषयलाई लिएर रौतहटमा विवाद तथा दोहोरो झडप हुँदा १३ जना घाइते भएका छन् ।
रौतहटको माधवनारायण नगरपालिका–४ विष्णुपुरमा रहेको माध्यामिक विद्यालयको व्यवस्थापन समिति अध्यक्ष चयन गर्ने विषयमा दुई समूहको माझमा २०७८ साउन १७ गते झडप भएको हो । झडपमा दुई समूहका गरी १३ जना घाइते भएको प्रहरीले बताएको छ ।
विद्यालय व्यवस्थापन समितिका अध्यक्ष देवनारायण भगत मालीको निधन भएपछि विद्यालयमा नयाँ अध्यक्ष चयन गर्ने तयारी गरिएको थियो ।
विद्यालयका प्रधानाध्यापक राजेश यादव र पूर्वअध्यक्ष देवनारायणका नाति पारस भण्डारीको समूहले आफ्नो पक्षको अध्यक्ष हुनुपर्ने र माधवनारायण–४ का वडाध्यक्ष रामदेनी मुखियाले पनि आफ्नो समूहबाट अध्यक्षको तयारी गरेपछि दुई समूहमाझ झडप भएको हो ।
विद्यालयको अध्यक्ष बन्न विद्यालयमा अध्ययरनत विद्यार्थीका अभिभावक मात्रै हुन पाउने प्रावधान रहेकाले वडाध्यक्ष मुखियाका छोरा रामतलेवर मुखिया बच्चा भर्ना गराउन विद्यालय पुगेका थिए । विद्यार्थी भर्नाको सम्बन्धमा कुरा नमिलेपछि विवाद सुरु भएको बताइएको छ ।
बाँसका भाटासहित दुई पक्ष झडपमा उत्रिएपछि १३ जना घाइते भएका हुन् । घटनामा संलग्न दुवै पक्षका एक/एक जनालाई नियन्त्रणमा लिइएको जिल्ला प्रहरी कार्यालय रौतहटले बताएको छ ।
‘विद्यालय व्यवस्थापन समितिको अध्यक्ष चयन हुनुपर्ने निहुँमा झडप भएको हो । घटनामा संलग्न रामकलेवर मुखिया र दिलीप कुमार भण्डारीलाई नियन्त्रण लिएका छौँ’ एसपी शाहले सञ्चार माध्यमसित भने– ‘घटनाका विषयमा कुनै पक्षबाट जाहेरी आएको छैन । थप संलग्नहरुको खोजी भइरहेको छ ।’
घाइतेहरू हाला खतरामुक्त रहेको र घटनाको विषयमा आवश्यक अनुसन्धान सुरु गरिएको प्रहरीले जनाएको छ ।
