पुष्कर भट्ट, कञ्चनपुर ।
कञ्चनपुरका विभिन्न विद्यार्थी संगठनहरूले दार्चुलामा तुइन काटेर नेपाली नागरिकलाई महाकालीमा बेपत्ता बनाउने एसएसबीका जवानलाई कारबाही गर्न माग गरेका छन् ।

अखिल (छैठौं) सहित विभिन्न ८ विद्यार्थी संगठनले सोमबार संयुक्त विज्ञप्ति प्रकाशित गरी दार्चुलाका प्रमुख जिल्ला अधिकारीले एसएसबीकै पक्षमा अभिव्यक्ति दिएको भन्दै आपत्ति जनाएका छन् ।

विद्यार्थी संगठनहरूले प्रत्यक्षदर्शीको बयानबाट घटनामा एसएसबीको संलग्नता पुष्टि भइसकेको भन्दै छानबिन र अध्ययनका नाममा जनताको आँखामा छारो नहाल्न चेतावनी दिएका छन् ।

यस्तै, उनीहरूले भारतीय साम्राज्यवादले नेपालमाथि थिचोमिचो गरिरहेको भन्दै त्यसविरुद्ध संघर्ष गर्न आव्हान गर्दै महाकालीमा बेपत्ता जयसिंह धामीलाई न्याय दिन दिलाउन आग्रह गरेका छन् ।