काठमाडौँ । बढ्दो सहरीकरणसँगै बच्चालाई दुध खुवाउने परम्परा घट्दै गइरहेका बेला सरकारले ‘ह्युमन मिल्क बैङ्क’ स्थापना गर्ने भएको छ ।
स्वास्थ्य सेवा विभाग, परिवार कल्याण महाशाखाले २०७८ साउन १७ गते पत्रकार सम्मेलन गरी राजधानीको थापाथलीस्थित परोपकार प्रसूति गृह तथा स्त्रीरोग अस्पतालमा सो बैङ्क स्थापना गर्ने बताएको हो ।
जन्मेदेखि छ महिनासम्मका शिशुलाई अनिवार्य रूपमा आमाको दुध मात्रै खुवाउनुपर्ने भएकाले प्रशस्त दुध आउने आमाको दुध संरक्षण गरेर राख्न ‘ह्युमन मिल्क बैङ्क’ स्थापना गर्न लागिएको महाशाखाका पोषण शाखा प्रमुख केदारराज पराजुलीले जानकारी दिए ।
‘कम दुध आउने आमाका शिशुलाई चिकित्सकको सल्लाहमा आमाकै दुधको व्यवस्था गर्न सरकारले हुयुमन मिल्क बैङ्क स्थापना गर्ने तयारी गरेको हो’ विश्व स्तनपान सप्ताहको शुभारम्भ कार्यक्रमको अवसरमा आयोजित पत्रकार सम्मेलनमा उनले भने– ‘जुन आमाको दुध तत्काल आउँदैैन वा कमी छ, त्यस्ता बच्चालाई सो बैङ्कमा राखिएको दुधको व्यवस्था गर्ने छौँ ।’
शाखाले यसरी स्थापना गरिने मिल्क बैङ्कमा दुध राख्नका लागि करीब एक करोड रुपियाँ लागतमा मेसिन खरिद गर्ने तयारी गरेको जनाएको छ ।
कार्यक्रममा आमाको दुधलाई विस्थापित गर्ने गरी आएको ल्याक्टोजिनको विज्ञापन नगर्न÷नगराउन पनि सम्बन्धित सबै पक्षलाई सचेत गराएको थिया । शाखाप्रमुख पराजुलीले ल्याक्टोजिनको विज्ञापन गरेको पाइए कडा कारबाही गर्ने चेतावनीसमेत दिए ।
‘ल्याक्टोजिनको विज्ञापन कहिँ भएको पाइए त्यसउपर कडा कारबाही हुन्छ’ उनले भने ।
साउन १७ गतेबाट सुरु भएको विश्व स्तनपान सप्ताह साउन २३ गतेसम्म चल्ने छ ।
‘हामी सबैको साझा जिम्मेवारी, स्तनपान संरक्षण हुन्छ प्रभावकारी’ मूल नाराका साथ मनाउन सुरु गरिएको स्तनपान सप्ताहमा सबै स्थानीय तहमा समेत जनचेतनामूलक कार्यक्रम आयोजना हुने व्यवस्था मिलाइएको स्वास्थ्य सेवा विभाग, परिवार कल्याण महाशाखाले जनाएको छ ।
स्तनपान संरक्षण तथा सम्वद्र्धन गर्ने उद्देश्यले सन् १९९२ देखि हरेक वर्ष विश्वभर विश्व स्तनपान सप्ताह मनाउने गरिएको छ ।
