काठमाडौँ । कर्मचारीको सेवासुविधा र वृत्तिविकासको माग गर्दै नेपाल टेलिकमका कर्मचारीले विगत १२ दिनदेखि भद्रकालीस्थित केन्द्रीय कार्यालयको मूल ढोकाअगाडि धर्ना दिँदै आएका छन् ।
साविकको कर्मचारी विनियमावली–२०६१ मा रहेको तह १० मा आठ वर्ष र तह ११ मा पाँच वर्षको सेवावधि पूरा भएपछि स्वतः अवकाश हुने (क्यापिङ) सम्बन्धी व्यवस्था यथावत् राख्नुपर्नेलगायत ३२ सूत्रीय माग प्रस्तुत गर्दै कर्मचारीहरूले यही साउन ५ गतेदेखि धर्ना दिँदै आएका हुन् ।
नेपाल दूरसञ्चार राष्ट्रिय कर्मचारी सङ्गठन, नेपाल टेलिकम वर्कर्स युनियन र नेपाल टेलिकम युनियन कर्मचारी युनियनको अगुवाइमा सुरु गरिएको सो धर्नामा सहभागीले टेलिकम सञ्चालक समितिको २०७० साउन ६ गतेको निर्णयानुसार प्रत्येक तीन/तीन वर्षमा नेपाल राष्ट्र बैङ्कको प्राइज इन्डेक्सबमोजिम समायोजन हुनुपर्ने महङ्गी भत्ता समायोजन गरी लागु गर्न पनि अनुरोध गरेका छन् ।
नेपाल टेलिकम वर्कर्स युनियनका अध्यक्ष राजेन्द्रप्रसाद जोशीले कम्पनीको संस्थागत सुधार, कर्मचारीको वृत्तिविकास र ट्रेड युनियनको अधिकारबारे व्यवस्थापन तथा सम्बन्धित निकायसँग पटक पटक आग्रह गर्दासमेत सम्बोधन नभएपछि कर्मचारीले सङ्घर्षको कार्यक्रम गर्नुपरेको जानकारी दिनुभयो । उहाँले वार्ताका लागि मात्रै भन्दा अर्थपूर्ण वार्ताका लागि सम्बन्धित निकायसँग आग्रह गर्नुभयो ।
