काठमाडौँ । समाचार लेखेको आधारमा गन्डक न्युज डट कमका सम्पादक रञ्जन अधिकारीलाई धम्की दिएकोप्रति पत्रकारिता क्षेत्रसँग सम्बद्ध विभिन्न सङ्घसंस्थाले आपत्ति जनाएका छन् ।

पोखराका क्रियाशील पत्रकार अधिकारीले गन्डक न्युज डट कमका लागि यही साउन ६ गते पोखरा–११ काहुँको कालिका माविमा व्यापार, सरकारी अनुदान लिने, निःशुल्क किताब फर्जी बिल भिडाउँदै बेच्ने (भिडियो) शीर्षकमा समाचार लेख्नुभएको थियो ।

उक्त विषयलाई लिएर सो विद्यायलका प्रधानाध्यापक निर्मला मानन्धरका श्रीमान बताउने कृष्ण श्रेष्ठले लगातार फोन, म्यासेन्जर, एसएमएसमार्फत धाकधम्की दिएको विज्ञप्तिमा उल्लेख छ । प्रकाशित समाचारमा चित्त नबुझे खण्डन गर्ने, प्रेस काउन्सिलमार्फत कानुनी उपचार खोज्ने विकल्प हुँदाहुँदै धाकधम्कीमा उत्रिनु असह्य हर्कत भएको उल्लेख गर्दै सङ्घसंस्थाबाट प्रकाशित विज्ञप्तिमा प्रेस स्वतन्त्रतामाथि आघात पुर्याउने यस घटनाको सत्यतथ्य छानबिन गरी दोषीलाई तत्काल कानुनी कारबाही गर्न जोडदार माग गरिएको छ ।

उक्त घटनाका दोषीलाई कानुनी दायरामा ल्याएर कारबाही गर्न माग गर्दै नेपाल पत्रकार महासङ्घ गण्डकी प्रदेश, नेपाल पत्रकार महासङ्घ कास्की शाखा, अनलाइन पत्रकार सङ्घ गण्डकी, प्रेसचौतारी नेपाल, प्रेस युनियन, प्रेस सङ्गठन, फोनिज कास्कीलगायतका सञ्चारसँग आबद्ध सङ्घसंस्थाले विज्ञप्तिमार्फत माग गरेका हुन् ।

पत्रकार महासङ्घ कास्की शाखाले घटनाका दोषीलाई कानुनी कारबाहीमा ल्याउन पहल नगरेको भन्दै प्रेसचौतारी नेपाल कास्की शाखाले महासङ्घको कार्यालयमा तालाबन्दी गरेको छ । पत्रकारको पेसागत छाता सङ्गठनले दोषीमाथि तत्काल कारबाही गरी पीडितलाई न्याय दिन माग राखी महासङ्घको कार्यालयमा ताला लगाएको प्रेसचौतारी कास्कीका अध्यक्ष अर्जुन गिरीले जानकारी दिनुभयो ।