काठमाडौँ । नागरिक दैनिकमा कार्यरत पत्रकारको बक्यौता पारिश्रमिक तत्कालै भुक्तानी गर्न नेपाल पत्रकार महासङ्घले माग गरेको छ ।
सो दैनिकमा कार्यरत पत्रकार (जिल्ला संवाददाता तथा स्ट्रिन्जर) लाई पारिश्रमिक उपलब्ध नगराएको तथा त्यसका विरुद्ध उनीहरू अनशनमा बसिरहेको सन्दर्भमा महासङ्घका महासचिव रोसन पुरीले २०७८ साउन १३ प्रेसविज्ञप्ती जारी गर्दै यस्तो माग गर्नुभएको हो ।
“एउटा प्रतिष्ठित मिडिया हाउसबाट लामो समयदेखि पत्रकारलाई काम लगाएर पारिश्रमिक उपलब्ध नगराउनु दुःखद पक्ष हुनुका साथै श्रमजीवी पत्रकार ऐन विपरीत हुने महासङ्घको ठहर छ” विज्ञप्तिमा भनिएको छ– “ महासङ्घ यस विरुद्ध दबाबमूलक सङ्घर्षको कार्यक्रममा उत्रन बाध्य हुने चेतावनी दिन चाहन्छ ।”
यस्तो प्रेसविज्ञप्तिको पूर्ण पाठ–
“नेपाल रिपब्लिक मिडियाद्वारा सञ्चालित नागरिक दैनिकमा कार्यरत झन्डै तीन दर्जन जिल्ला संवाददाता तथा स्ट्रिन्जरलाई व्यवस्थापन पक्षबाट झन्डै तीन वर्षदेखिको पारिश्रमिक उपलब्ध नगराएकोप्रति नेपाल पत्रकार महासङ्घको गम्भीर ध्यानाकर्षण भएको छ ।
पारिश्रमिक उपलब्ध गराउन माग गर्दै नागरिक दैनिकमा कार्यरत जिल्ला संवाददाता तथा स्ट्रिन्जरहरू काठमाडौँ सुन्धारास्थित पत्रिकाको कार्यालयमा अनसनरत रहेका छन् । पत्रकारहरूको उक्त अनसनमा महासङ्घका वरिष्ठ उपाध्यक्ष रमेश विष्ट र महासचिव रोसन पुरी सहभागी भई ऐक्यबद्धता जनाउनुभएको छ ।
एउटा प्रतिष्ठित मिडिया हाउसबाट लामो समयदेखि पत्रकारलाई काम लगाएर पारिश्रमिक उपलब्ध नगराउनु दुःखद पक्ष हुनुका साथै श्रमजीवी पत्रकार ऐन विपरीत हुने महासङ्घको ठहर छ । महासङ्घ श्रमजीवी पत्रकार ऐनअनुसारको सबै सेवासुविधासहित अनसनरत पत्रकारको बाँकी पारिश्रमिक तत्काल उपलब्ध गराउन पत्रिका व्यवस्थापन पक्षसँग माग गर्दछ, अन्यथा महासङ्घ यस विरुद्ध दबाबमूलक सङ्घर्षको कार्यक्रममा उत्रन बाध्य हुने चेतावनी दिन चाहन्छ ।”
