वासिङटन । अमेरिकी राष्ट्रपति जो बाइडेनले यस वर्षको अन्त्यसम्ममा अमेरिकी लडाकु सैनिकलाई इराकबाट फिर्ता बोलाउने बताउनुभएको छ ।
उहाँले अमेरिकी सेना थोरै सङ्ख्यामा मात्र भए पनि इराकमा बसेर इराकी सेनालाई तालिम र आवश्यक सरसल्लाह भने दिइरहने जानकारी दिनुभयो । इराकी प्रधानमन्त्रीसँगको भेटवार्ताका क्रममा राष्ट्रपति बाइडेनले सो जानकारी दिनुभएको हो ।
हाल इराकी प्रधानमन्त्री मुस्ताफा अलखादिमी अमेरिकी भ्रमणमा हुनुहुन्छ । प्रधानमन्त्री मुस्ताफासँग ह्वाइट हाउसमा भएको कुराकानीका क्रममा राष्ट्रपति बाइडेनले यस्तो घोषणा गर्नुभएको हो । उहाँहरूबिच सोमबार ह्वाइट हाउसमा भेटवार्ता भएको थियो ।
इराकमा हाल दुई हजार ५०० भन्दा बढी अमेरिकी सैनिक रहेका छन् । इराकमा पछिल्लो समयमा इस्लामिक स्टेट नामक आतङ्ककारी समूहको उपस्थिति बढ्दै गएको छ । हाल इराकमा रहेका अमेरिकी सैनिकले इराकी फौजलाई इस्लामिक स्टेट लडाकुका विरुद्ध लड्न सहयोग गरिरहेको छ ।
अमेरिकाको यो घोषणापछि पनि केही अमेरिकी सैनिक भने इराकमै रहने छन् । यो घोषणाको इराकले स्वागत गरेको छ । अमेरिकाले इराकी प्रधानमन्त्रीलाई सहयोगका लागि यो घोषणा गरेको हुन सक्ने अनुमान गरिएको छ ।
इराकी प्रधानमन्त्री खादिमीले इराकमा कुनै पनि विदेशी सेना आवश्यक नरहेको बताउनुभयो । उहाँले अमेरिकाको सो घोषणाको समर्थन गर्दै भन्नुभएको छ– ‘हामीलाई अमेरिकाको सैन्य सहयोग त आवश्यक छ, तर पनि इराकमै आएर सैनिक परिचालन नभएर इराकलाई सुरक्षा सामग्री र तालिमका विषयमा सहयोग दिँदा राम्रो हुने छ ।’
गत वर्ष इराकको राजधानी बग्दादमा अमेरिकी सेनाले ड्रोन हमला गर्दा एक जना उच्च इरानी सैन्य जनरल कासिम सुलेमानी र इरानको समर्थन पाएको सिया मुस्लिम मिलिसिया समूहका एक जना नेता मारिएका थिए । त्यसयता इराकमा अमेरिकी सेनाको झन् ठुलो विरोध भएको थियो । यहाँका राजनीतिक दलले अमेरिकी नेतृत्वमा आइएस विरुद्ध लड्न अन्तर्राष्ट्रिय फौज हट्नुपर्ने माग गरिरहेका छन् । (रासस/सिन्ह्वा)
