मनाङ । गत जेठ १४ गतेदेखि बाढीपहिरोका कारण सडक सञ्जालमा पूर्ण विच्छेद भएको मनाङको अनुगमन गर्न मन्त्री र सेनाको टोली त्यहाँ पुगेको छ ।
सडक पूर्ण रूपमा बाढीपहिरोले बगाएपछि त्यस्ता स्थानमा नयाँ ट्र्याक निर्माण गर्न मिल्ने÷नमिल्नेबारे जानकारी लिन तथा सुरक्षित सडक सञ्जाल निर्माणका लागि अध्ययन तथा अनुगमन गर्न पूर्वश्रम तथा रोजगार राज्यमन्त्री एवम् नेपाली काङ्ग्रेस मनाङका सभापति टेकबहादुर गुरुङ सैनिक प्राविधिकको टोलीसहित मनाङ पुग्नुभएको हो ।
पूर्वमन्त्री गुरुङ नेपाली सेनाका महासेनानी इन्जिनियर इन्दिवर गुरुङ, अन्य प्राविधिक टोली, गण्डकी प्रदेशसभा सदस्यद्वय चिन्ताबहादुर घले र यशोदा सुवेदी गुरुङ, प्रमुख जिल्ला अधिकारी विष्णु लामिछाने, जिल्लाका प्रमुख प्रहरी नायब उपरीक्षक सुवास खड्का र समाजसेवी खामसुङ गुरुङ नेपाली सेनाको हेलिकप्टरमार्फत अध्ययन तथा अवलोकनका लागि पुग्नुभएको हो ।
गुरुङले सदरमुकाम चामेमा मस्र्याङ्दी नदीले क्षति पु¥याएको मोटरेबल पुल, झोलुङ्गे पुल तथा नदी कटान गरेको लोकप्रिय माध्यमिक विद्यालयको निरीक्षण गर्नुभएको छ । साथै मोटरेबल पुल र विद्यालय भवनको संरक्षणका विषयमा प्राविधिकसँग छलफलसमेत गर्नुभएको छ । सदरमुकाम चामेको एक मात्र सामुदायिक आवासीय लोकप्रिय माध्यमिक विद्यालयको संरक्षणमा विशेष चासोको विषय बनेको छ ।
प्राविधिकसहितको टोलीले धारापानी र ताल क्षेत्रको पनि स्थलगत अवलोकन तथा अध्ययन गरेको स्थानीयवासी थुदेन लामाले जानकारी दिनुभयो । साथै टोलीले विभिन्न समयमा आएको बाढीपहिरोले अवरुद्ध रहेको बेसीसहर–चामे सडकखण्ड पुनः सञ्चालन गर्नका लागि अध्ययन गर्ने प्रमुख जिल्ला अधिकारी विष्णु लामिछानेले जानकारी दिनुभयो ।
प्राविधिक टोलीको नेतृत्व गर्नुभएका नेपाली सेनाका मिलिटेरी इन्जिनियर सेवाका प्रमुख महासेनानी गुरुङकै टोलीले बेसीसहर–चामे सडकको नयाँ ट्र्याक खोल्ने कार्य गर्नेसमेत प्रजिअ लामिछानेले बताउनुभयो ।
माटोको अवस्था अध्ययन तथा अनुगमनपछि सेनाको प्राविधिक टोलीले बेँसीशहर–चामे सडकखण्डको नयाँ ट्र्याक खोल्न खटिने जनाइएको छ । नयाँ ट्र्याक खोल्न सकिएमा छिट्टै मनाङवासीले सहज रूपमा सडक सञ्जालमार्फत आवतजावत गर्न पाउने छन् ।
