काठमाडौं । बाग्लुङ २ (ख) मा नेकपाबाट बागी उम्मेद्वारी दिएका नेकपाका शेरमान घर्तीले वाम गठबन्धनका उम्मेद्वार खिमविक्रम शाहीलाई सघाउने भएका छन् । आइतबार उम्मेद्वारी फिर्ता लिन मुख्य निर्वाचन अधिकृतको कार्यालय पुगेका घर्तीले समय अभावका कारण उम्मेद्वारी फिता लिन नसकेपछि पत्रकार सम्मेलनमाफर्तत शाहीलाई नै सघाउने घोषणा गरे ।

नेकपा बाग्लुङका अध्यक्ष ईन्द्रलाल सापकोटाका अनुसार कानूनी रुपमा उम्मेदवार फिर्ता नभए पनि सहमति गरेर गठबन्धनका शाहीलाई नै सघाउन घर्ती तयार भएका हुन् । नेकपाले बाग्लुङ क्षेत्र नम्बर २ प्रदेशसभा (ख) राजमोलाई छाड्ने गरी नेकपा र राजमोबीच सहमति भएको थियो । पार्टी निर्णयविरुद्ध घर्तीले बिहीबार प्रदेससभा सदस्यका लागि मनोनयन दर्ता गरेका थिए ।

पार्टी निर्णयविपरित मनोनयन दर्ता गरेपछि फिर्ता लिन नेकपाले दबाब दिँदै आएको थियो । आइतबार ढोरपाटन नगरपालिकाका मेयर देवकुमार देवकुमार नेपालीले घर्तीसँग सहमतिको पहल गरी आफ्नै हेलिकप्टरमा राखेर सदरमुकाम ल्याएका थिए ।निर्वाचन आयोगले उम्मेदवारी फिर्ता लिने समय आज दिउँसो १ बजेसम्मका लागि तोकेको थियो ।

उनीहरु आयोगले तोकेको समयभन्दा २० मिनेट ढिला गरी आएपछि कानूनी रुपमा उम्मेदवारी फिर्ता गराउन नेकपा असफल भएको थियो । त्यसपछि उम्मेदवार घर्तीसहित नेकपाका जिल्लाका जिम्मेवार नेताहरुबीच भएको छलफलपछि घर्ती शाहीलाई सघाउने निर्णयमा पुगेका हुन् ।

निर्वाचन हुने क्षेत्रबाट सदरमुकाममा उम्मेदवारी फिर्ताको लागि मुख्य निर्वाचन अधिकृतको कार्यालय पुग्नुअघिनै समय सकिएको भन्दै घर्तीले पत्रकार सम्मेलन मार्फत उम्मेदवारी फिर्ता लिएको घोषणा गरेका हुन । नेपाल कम्युनिष्ट पार्टीको लामो परामर्श पछि उनले बाम गठबन्धनका उम्मेदवार खिम विक्रम शाहीलाई सघाउने घोषणा गरेका हुन् ।

प्रक्रियागत रुपमा उम्मेदवारी फिर्ता गर्न नपाए पनि पत्रकार सम्मेलन मार्फत बाम गठबन्धनका उम्मेदवारलाई सघाउने प्रतिबद्धता घर्तीले जनाए । ‘सम्पुर्ण प्रदेशबासी जनतालाई नेपाल कम्युनिष्ट पार्टी नेकपा र राष्ट्रिय जनमोर्चाका सझा बामपन्थी उम्मेदवार कमरेड खिम विक्रम शाहीलाई गिलास चिन्हमा मतदान गरी बिजयी गराउन हार्दिक अपिल गर्दछु’ घर्तीले जारी गरेको बिज्ञप्तीमा भनिएको छ ।