दिनेश रैदास, दाङ ।।
हुलाकी सडक आयोजनको लापरवाहीले दाङका कैयौँ क्षेत्र डुबानमा परेको छ । कालाकाटे, गढवा, बेला, राजपुर, सिक्टा, हाडबास हुँदै नेपालगञ्ज जोड्ने हुलाकी सडक आयोजनाका कारण डुबान परेको हो ।
गढवा र राजपुर सडकखण्डको राजपुर ४ दुलैयाचोकदेखि पूर्व २०० मिटर र मावि दुलैयादेखि पश्चिम २०० मिटरका बिचमा पर्ने स्थानीय रामफकिरे रैदासको घरनिर रहेको यसपूर्व बनेको ह्युमपाइप गत जेठ २९ गते सडक आयोजनाले पानी निकासको कुनै दिगो व्यवस्थापन नगर्दा डुबान परेको छ ।
वर्षयाम सुरु भएलगत्तै आयोजनाको निकास हटाइदिँदा दक्षिणी चुरेक्षेत्रबाट बग्ने वेलासी सोताको बाढी पसेर उक्त घर र भान्सा घर डुबान गरी घरमा भएका खाद्यवस्तु, लत्ताकपडा, भाँडाकुँडासमेत नष्ट भएका छन् ।
पाँच जना सदस्य रहेको रैदास परिवार असार ३१ गते आएको अविरल वर्षा र बाढीका कारण विस्थापित हुन परेको छ ।
बाढीले गहुँ दुई क्विन्टल, धान छ क्विन्टल, दाल ३०÷४० किलो, तोरी २५÷३० किलो, खानेतेल, एक इन्चको मोटर गरी लगभग ४२ हजार रुपियाँ बराबरको क्षति भएको छ भने रैदास परिवार छिमेकीको आफन्तकहाँ आश्रय लिएका छन् ।
