दमासकस । चीन र सिरियाका विदेशमन्त्रीहरू द्विपक्षीय सम्बन्धको थप सुदृढ गर्ने विषयमा सहमत भएका छन् ।
उहाँहरूबिच शनिबार सिरियाको दमासकसमा भेटवार्ता भएको थियो । सो भेटमा आपसी सहयोग र समझदारी बढाउने विषयमा सहमति भएको हो ।
चिनियाँ विदेशमन्त्री वाङ यी हाल सिरियाको भ्रमणमा हुनुहुन्छ । उहाँले शनिबार दमास्कसमा सिरियाली विदेशमन्त्री फाइजल मेकदादसँग भेटवार्ता गर्नुभएको थियो । यी दुई देशबिच ६५ वर्षअघि नै कूटनीतिक सम्बन्ध स्थापना भएको स्मरण गर्दै चीन र सिरियाबिचको यो लामो सम्बन्ध सुमधुर रहेको बताउनुभएको थियो ।
त्यस अवसरमा सिरियामा शान्ति र यहाँको विकासका लागि चीन सधैँ सकारात्मक रहेको भन्दै चिनियाँ विदेशमन्त्री वाङले आगामी दिनमा पनि चीनले सिरियालाई आवश्यक सहयोग गर्ने बताउनुभएको हो । सिरियामा लामो समयदेखि हिंसात्मक क्रियाकलाप जारी रहेका भन्दै उहाँले चीन सधैँ सिरियाली नागरिक र सिरियाका पक्षमा रहेको धारणा पनि राख्नुभएको थियो ।
त्यस अवसरमा चिनियाँ विदेशमन्त्री वाङले हालै कोभिडका कारण समस्यामा परेको सिरियाका लागि कोभिड–१९ का विरुद्धको खोप तथा अन्य औषधि तथा स्वास्थ्य सामग्रीहरू सहयोग गर्ने जानकारी पनि दिनुभएको थियो । (रासस/सिन्ह्वा)
