बेइजिङ । चीनका विदेशमन्त्री वाङ यीले अफगानिस्तानलाई कोभिड १९ को महामारीका विरुद्धमा सहयोग गर्ने बताउनुभएको छ ।
अफगानिस्तानलाई चीनले यसअघिदेखि नै कोभिड महामारीका विरुद्धमा सहयोग पुर्याउँदै आएको र आगामी दिनमा पनि यस विषयमा सहयोग गर्ने धारणा राख्नुभएको हो ।
उहाँले पछिल्लो समयमा अफगास्तिानमा कोभिड महामारीका सङ्क्रमित बढ्दै गएको भन्दै महामारीसँग लड्ने औषधि स्वास्थ्य औजारका साथै खोप आदि उपलब्ध गराएर चीनले अफगानिस्तानलाई सहयोग गर्ने विदेशमन्त्री वाङले जानकारी दिनुभएको हो ।
विदेशमन्त्री वाङले अफगानिस्तानका विदेशमन्त्री मोहमद हानिफ आतमारसँग बिहिबार भएको द्विपक्षीय भेटवार्ताका क्रममा सो सहयोगको आश्वासन दिनुभएको हो । उहाँले सो भेटका अवसरमा चीन र अफगानिस्तान पहाड तथा नदीले छुट्याएका दुई छिमेकी देश हुन् भन्नुभएको छ । अफगानिस्तानसँग चीनको विगत धेरै लामो समयदेखिको मित्रता रहिआएको पनि सो अवसरमा उहाँले बताउनुभएको थियो ।
उहाँले त्यस अवसरमा हाल अफगानिस्तानमा रहेका चीनका नागरिक र चिनियाँ विभिन्न सङ्घसंस्था आदिको सुरक्षाका लागि पनि आग्रह गर्नुभएको थियो । अफगानिस्तानमा हाल तालिबानी लडाकुले दिन–प्रतिदिन हिंसात्मक हमलाका घटना बढाएका छन्, जसका कारण यहाँ दैनिकजसो नागरिकको ज्यान जान थालेको पनि पाइएको छ । (रासस/सिन्ह्वा)
