काठमाडौं । राष्ट्रिय जनमोर्चाले महोत्तरीकी युवती सुजिता ठाकुरको हत्यामा संलग्नलाई कडा कारबाही गर्न माग गरेको छ । राजमोका उपाध्यक्ष दुर्गा पौडेलले सोमबार एक विज्ञप्ति प्रकाशित गरी घटनाको समयमै अनुसन्धान गर्न रुची नदेखाउने प्रहरी अधिकारीमाथिसमेत छानविन र कारबाही गर्न माग गर्नुभएको छ ।
गत जेठ २० गते परिवारबाटै बेपत्ता बनाइएकी सुजिताको शव २३ दिनपछि शौचालयको सेप्टिक ट्याङकीमा फेला परेको थियो । सो घटनाबारे माइतीपक्षले सुरुमै प्रहरीमा जाहेहरु दिए पनि प्रहरी उपरीक्षक दिनेश आचार्यले जाहेरी लिन अस्वीकार गरेको परिवारको भनाइ छ।
राजमोले सुजिताको हत्या दाइजो र सम्पत्तिकै कारण भएको भन्दै महिला हिंसा, दाइजो नियन्त्रण र सामाजिक कुसंस्कारका विरुद्ध सशक्त कार्यक्रम सञ्चालन गर्न सरकारसँग माग गरेको छ ।
विज्ञप्तिमा भनिएको छ
महोत्तरीको लोहरपट्टी नगरपालिका वडा नं. ७ भ्रमरपुराकी २६ वर्षीया सुजिता ठाकुरको हत्या गरी शौचालयको ट्याङ्कीमा शव फालिएको पाइएको छ । सुजितालाई उनकै ससुरा, देवर र देवरानीसहित मिलेर हत्या गरेको प्रारम्भिक अनुसन्धानबाट पत्ता लागेको छ । आफ्नै परिवार मिलेर सुजिताको हत्या हुनु निकै ठूलो अपराध हो ।
सुजिता हत्याकाण्डमा सुरुमा जिल्ला प्रहरीले ससुरासँगको मिलेमतोमा अनुसन्धान गर्न आनाकानी गरेको थियो । उनका ससुराले सुजिता अर्कै पुरुषसँग भागेको बताएका थिए । प्रहरीले हत्याजस्तो गम्भीर अपराधमा अनुसन्धान गर्न रुची नदेखाउने प्रहरीमाथि नै छानविन गर्नुपर्ने आवश्यकता छ । पीडित र अधिकारकर्मीको अनुरोधमा २ प्रदेश प्रहरीको सक्रियतामा सुजिताको शव फेला परेको छ । सुजिता हत्याकाण्डका दोषीमाथि कडा कारवाही गर्न माग गर्दछौं ।
दाइजो र सम्पत्तिकै कारण सुजिताको हत्या भएको प्रहरीले बताएको छ । तराइमा दाइजोका कारण धेरै महिलाहरुको हत्या हुने गरेको छ । तराइमा दाइजो विरोधी ठूलो आन्दोलन गर्नुपर्ने आवश्यकता छ । महिला हिंसा, दाइजो नियन्त्रण र सामाजिक कुसंस्कारका विरुद्ध सशक्त कार्यक्रम सञ्चालन गर्न सरकारसँग माग गर्दछौं ।
