भद्रपुर । झापा कारागारमा रहेका कैदीबन्दीले सिन्धुपाल्चोकस्थित हेम्लम्बु गाउँपालिकाका बाढीपीडितका लागि ५० हजार १०० रुपियाँ नगद पठाएका छन् ।
वर्षायामको सुरुवाती दिनमै सिन्धुपाल्चोकमा बाढीपहिरोका कारण ठुलो धनजनको क्षति भएपछि पीडित परिवारलाई राहतस्वरूप सहयोग गर्ने उद्देश्यले सो नगद रकम कैदीबन्दीले पठाइदिएका हुन् ।
‘परिस्थितिले हामी जहाँ रहे पनि जस्तो रहे पनि मानवीय संवेदना हुनुपर्छ’ कारागार झापामा कैदीबन्दीतर्फको आन्तरिक प्रशासन प्रमुख शेरबहादुर थेबेले भन्नुभयो– ’सिन्धुपाल्चोकका बाढीपीडितको पीडामा मलमपट्टि पुगोस् भनेर हामीले एक दिनको छाक कटाएर सहयोग पठाएका हौँ ।’
कैदीबन्दीले जम्मा गरेको रकम बुधबार पालिकाको बिपत् राहत कोषको खातामा जम्मा गरिएको जिल्ला कारागार झापाका प्रमुख राजेन्द्र गौतमले बताउनुभयो ।
झापा कारागारमा ७६ महिला र एक हजार १४६ पुरुष कैदीबन्दी रहेका छन् । (रासस)
