चितवन । सुजिता भण्डारीको मृत्युको विषयलाई लिएर झडप भएपछि जिल्ला प्रशासन कार्यालय चितवनले कर्फयू जारी गरेको छ । मंगलबार राप्तीमा स्थानीय र प्रहरी बीच झडप हुँदा ७ प्रहरी घाइते भएका छन् ।
स्थानीय तथा आफन्तले ढुंगामुडा, सरकारी तथा निजी सम्पत्ति र संरचनामा तोडफोड, आगजानी तथा हुलदंगा गरी सार्वजनिक शान्ति भंग गर्न सक्ने अवस्था देखिएकाले कफ्र्यू जारी गरेको प्रशासनले जनाएको छ । आज मंगलबार साँझ साढे ७ बजेदेखि भोलि बेलुकी साढे ७ बजेसम्म कफ्र्यु जारी गरिएको हो ।
यो अवधिमा लामो दूरीका बाहेक सवारी साधान सञ्चालन गर्न, हिँडडुल गर्न, भेला हुन प्रशासनको स्वीकृतिविना घरबाहिर निस्कन समेत नपाइने प्रशासनले जनाएको छ ।
आदेशको अवज्ञा गरे सुरक्षाकर्मीले तत्काल गिरफ्तार गरी एक महिनासम्म कैद वा जरिवाना वा दुवै गर्न सक्ने चेतावनी दिइएको छ । पूर्व पश्चिम राजमार्गको राप्ति नगरपालिका १ लोथरपुलदेखि राप्ति नगरपालिका ४ डढुवासम्मको राजमार्ग दायाँबायाँ ५ सय मिटरका क्षेत्रमा कफ्र्यु लागू हुनेछ ।
मृत फेला परेकी चितवनको राप्ती नगरपालिका–३ की सुजिता भण्डारीको पोष्टमार्टम रिपोर्ट उचित तरिकाले नभएको भन्दै स्थानीयले मंगलबार पूर्वपश्चिम राजमार्गमा टायर बालेर आन्दोलन गरेका हुन् । सोमबार पनि स्थानीयले राजमार्ग बन्द गरेर सुजिताको हत्यामा संग्लन अपराधीलाई पक्राउ गर्न आन्दोलन गरेका थिए ।
चितवनको राप्ती नगरपालिका–३ की २३ वर्षीया सुजिता यही असार ११ गते बिहान ६ बजे साथीको घर जाने भनेर आफ्नो घरबाट निस्केकी थिइन्। दिउँसोतिर आफू अपहरणमा परेको भन्दै अस्पष्ट आवाजमा फोन गरेको परिवारजनले बताएका छन्। त्यसपछि सम्पर्क हुन नसकेकी सुजिता असार २१ गते साँझ स्थानीय ब्रह्मस्थानी सामुदायिक वनमा मृत फेला परेकी थिइन्।
सुजिताको शव सडेको अवस्थामा फेला परेको थियो। उनको छेउमा एउटा झोलासहित विषादीको बोतल पनि भेटिएकाले घटना रहस्यमय देखिएको प्रहरीले जनाएको छ।
उनको शव परीक्षणका लागि काठमाडौंको महाराजगन्जस्थित त्रिवि शिक्षण अस्पतालमा ल्याइएको छ। भने प्रहरीले अनुसन्धान गरिरहेको जनाएको छ।
