काठमाडौं । नेपालमा गएको जेठ ३१ यता मात्रै बाढी तथा पहिरोका कारण ३३ जनाले ज्यान गुमाएका छन् भने ३० जना बेपत्ता भएका छन् । यो अवधिमा अर्बौंको भौतिक सम्पत्तिमा क्षति पुगेको छ ।

पछिल्लो अद्यावधिक सरकारी विवरण अनुसार गत जेठ ३१ यता मनसुनजन्य १७८ घटना भएका छन् । वर्षाका कारण भएका विभिन्न विपद्का घटनाहरूमा ४८३ घरहरू पूर्ण रूपमा क्षति भएका छन् भने ११२ घरहरूमा आंशिक क्षति भएको छ।

त्यस्तै ३६ वटा सरकारी कार्यालय, ६ वट सामुदायिक भवन र विद्यालय, २२ वटा झोलुङ्गे पुल, १३ वटा पक्की पुल र त्यति नै सङ्ख्यामा जलविद्युत आयोजना, पाँच वटा सवारी गुड्न योग्य काठका पुल र दुई वटा बैंक तथा वित्तीय संस्थामा क्षति भएको विवरण प्राप्त भएको छ।

मुलुकका प्रमुख राजमार्गहरू सहित विभिन्न सडक खण्डहरू पनि प्रभावित भएको बताइएको छ। निरन्तर वर्षाका कारण आएको बाढी र नदीमा बढेको बहावका कारण कतिपय स्थानमा पुल र सडक लगायतका संरचनाहरू भत्किएका छन्।

नदीहरुमा आकष्मिक बहावको सम्भावना
हाल प्रदेश १, प्रदेश २, बागमती प्रदेश, गण्डकी र लुम्बिनी प्रदेशका धेरै स्थानहरूमा ‘वर्षा भइरहेको र भारी वर्षाको पनि सम्भावना रहेको’ सरकारी निकायहरूले जनाएका छन्। यस क्षेत्रमा बुधवारबाट मनसुन थप सक्रिय भएको र शुक्रवारसम्म कायमै रहने जल तथा मौसम विज्ञान विभागले जनाएको छ ।

विभागको बाढी पूर्वानुमान शाखाले आफ्नो ह्यान्डलबाट ट्विट गर्दै आज कोशी, नारायणी र यसका सहायक नदीहरू तथा कन्काई, कमला, बागमती, पूर्वी रापती लगायतमा बहाव उल्लेख्य बढ्ने र केहीमा सतर्कता तह पुग्न सक्ने पूर्वानुमान रहेको जनाएको छ। ‘तटीय क्षेत्रहरू तथा डुबान भइरहने क्षेत्रहरूमा विशेष सावधानी अपनाउनुहुन अनुरोध छ’ उसले भनेको छ।

बाढी पूर्वानुमान महाशाखाका अनुसार शुक्रवार भोटेकोशी, तामाकोशी, दुधकोशी, सुनकोशी लगायत कोशीका सहायक नदीहरू र नारायणी र त्यसका सहायक नदीहरू त्रिशुली, बुढीगण्डकी, कालिगण्डकी र मर्स्याङ्दी लगायतमा उच्च जोखिम रहेको छ ।

कन्काई, कमला, बागमती र पूर्वी रापती जलाधारका केही सहायक नदीहरूमा मध्यम देखि भारी वर्षा भएर बहाव उल्लेख्य बढ्ने र सतर्क हुनुपर्ने तहमा पुग्ने जनाइएको छ। यी नदीहरूलाई पनि उच्च जोखिम रहेको क्षेत्रका रूपमा वर्गीकरण गरिएको छ।

राजमार्गहरूको अवस्था के छ?

गृह मन्त्रालय अन्तर्गतको राष्ट्रिय आपत्‌कालीन कार्य सञ्चालन केन्द्रको पछिल्लो विवरण अनुसार धादिङ जिल्लास्थित पृथ्वी राजमार्गमा लेदो सहितको पहिरोका कारण सडक अवरुद्ध भएको छ। त्यस्तै मुग्लिङ नारायणगढ खण्डका विभिन्न स्थानमा पहिरो खसेका कारण सडक अवरुद्ध भएको छ।

काभ्रेमा लेदो सहितको पहिरोका कारण बीपी राजमार्ग अवरुद्ध भएको छ। कान्ति लोकपथ र हेटौडा जाने बाटोमा पनि पहिरोको प्रभाव परेको छ। पृथ्वी राजमार्ग, मुग्लिङ नारायणगढ खण्ड र बीपी राजमार्ग एकतर्फी रूपमा खुलाइएको केन्द्रले जनाएको छ। हुलाकी राजमार्ग, अरनिको राजमार्ग, मध्य पहाडी राजमार्ग लगायत दर्जनौँ सडक खण्ड हाल अवरुद्ध रहेका छन्।