पोखरा । सत्तारुढ दल नेपाल कम्युनिस्ट पार्टी (नेकपा) का अध्यक्ष पुष्पकमल दाहाल ‘प्रचण्ड’ले बागलुङ क्षेत्र नम्बर २ (ख)मा वागी उम्मेद्वारी दिनेलाई तत्काल फिर्ता लिन चेतावनी दिनुभएको छ ।
बिहीबार पोखरामा आयोजित पत्रकार भेटघाट कार्यक्रममा प्रचण्डले राष्ट्रिय जनमोर्चासँग केन्द्रबाट नै तालमेल भएको प्रस्ट पार्दै नेकपाका पार्टी सदस्यहरु सहमति बाहिर जान नसक्ने बताउनुभयो ।
पत्रकारले बागलुङको प्रदेशसभामा नेकपाको बागी उम्मेदवारबार सोधेको प्रश्नको जवाफ दिँदै अध्यक्ष प्रचण्ड नेकपाको कोही सदस्यले उम्मेदवारी दिएको भए एक दुई दिनमै फिर्ता हुने बताउनुभएको हो ।
‘मैले यही आएपछि सुनेँ, त्यो कसरी, को उठेको हो’, अध्यक्ष प्रचण्डले भन्नुभयो, ‘पार्टीको निर्णय र हाम्रो सहमति जनमोर्चासँग भएको हो । उम्मेदवार हाम्रो पार्टीको हो भने मलाई के विश्वास छ भने भोलि पर्सि सम्ममा उहाँले फिर्ता लिनुहुन्छ। अरु कोही हो भने मुकाविला गर्नुपर्ने हुन्छ ।’
राष्ट्रिय जनमोर्चा र नेकपाबीच तालमेल भएर राजमोका खिमविक्रम शाहीले उम्मेद्वारी दिएको बाग्लुङ २(ख) मा नेकपाका कार्यकर्ता शेरमान घर्तीले वागी उम्मेद्वारी दिएका छन् । सो क्षेत्रमा राजमो र नेकपाबीच संयुक्त रुपमा चुनावी प्रचारको अभियान सुरु भएको छ ।
आगामी मंसिर १४ गते हुने निर्वाचनका लागि आज प्रतिनिधि सभामा १ र प्रदेश सभाका लागि तीन स्थानमा मनोनयन दर्ता भएको छ । प्रतिनिधिसभा अन्तर्गत कास्की क्षेत्र नं १ तथा प्रदेश सभा अन्तर्गत बाल्गुङ २ (ख), दाङ ३ (ख) र भक्तपुर १(क) मा मनोनयन दर्ता भएको हो।
