हैदराबाद (भारत) । भारतको हैदरवादस्थित एक कम्पनीमा कार्यरत नेपालीको कामकै शिलशिलामा मृत्यु भएपछि मूल प्रवाह अखिल भारत नेपाली एकता समाजले सम्बन्धित कम्पनीबाट परिवारलाई क्षतिपुर्ती दिलाएको छ ।
रुपन्देहीको गैडहवा गाउँपालिका–७ का २७ वर्षीय अनिल विकको आलमुनियम मोडिभकेसन कम्पनीमा काम गर्ने क्रममा ग्यास विस्फोट भएर मृत्यु भएको थियो । तेलंगाना राज्यको हैदरावाद प्रशान्तनगरमा रहेको सो कम्पनीमा उनी विगत नौ वर्षदेखि कार्यरत थिए ।
२५ जुन २०२१ का दिन भट्टिको ढोका खोल्ने क्रममा ग्यास भट्टि पड्किएर अनिल बेहोस भएका थिए । तुरुतै नजिकको अस्पतालमा पुर्याइएकोमा उनलाई डाक्टरले मृत घोषित गरेका थिए ।
दुर्घटनामा परि ज्यान गुमाएका विकको परिवारलाई मूल प्रवाहको पहलमा ६ लाख २५ हजार रुपैयाँ क्षतिपुर्ती दिलाइएको हो । मूल प्रवाह मध्य दक्षिण क्षेत्रीय समितिका सचिवालय सदस्य घनश्याम शर्माको नेतृत्वमा गएको प्रतिनिधि मण्डलले पहल गरी कम्पनीबाट क्षतिपुर्ती उपलब्ध गराएको थियो ।
घटनालगत्तै मूल प्रवाहले मृतकका आफन्तलाई कुकटपल्ली पुलिस स्टेशनमा रिपोर्ट गरी एफआईआर दर्ज गर्न मद्दत गरेको थियो ।एफआईआर दर्ज गरिए पछि कम्पनी मालिकलाई पुलिस स्टेशनमा बोलाएर मूल प्रवाहको प्रतिनिधिहरुले क्षतिपूर्तिको माग अगाडी बढाएको थियो ।
करिब २ दिनसम्मको प्रयासबाट रु. ५ लाख २५ हजार तत्काल र १ लाख पछि केस निकाल्दा दिने गरी ६ लाख २५ हजार दिलाइएको छ । इएसआई र पेनशन मिलाउने सहमति भएको छ ।
हस्पिटलको सबै प्रकिया पुरा गरि २७ जुन २०२१ का दिन मुसापेट समसानघाटमा मूल प्रवाहका नेता कार्यकर्ता र कम्पनीका कर्मचारीहरुको उपस्थितिमा मृतकका आफन्तले दाहसंस्कार गरेका छन् ।
