काठमाडौँ । राष्ट्रपति विद्यादेवी भण्डारीले विभिन्न संवैधानिक निकायका २० पदमा नियुक्ति गर्नुभएको छ ।
राष्ट्रपतिको कार्यालयले २०७८ असार १० गते विज्ञप्ति जारी गर्दै सो जानकारी दिइएको हो ।
प्रवक्ता रूपनारायण भट्टराईको हस्ताक्षरमा जारी विज्ञप्तिमा अख्तियार दुरूपयोग अनुसन्धान आयोगको आयुक्तमा डा. हरि पौडेल र डा. सुमित्रा श्रेष्ठलाई नियुक्त गरिएको उल्लेख छ ।
त्यस्तै लोक सेवा आयोगको अध्यक्षमा माधवप्रसाद रेग्मी तथा सदस्यहरूमा माधव बेलबासे, वीरबहादुर राई, दिनेश सिलवाल र मञ्जु कुमारीलाई नियुक्त गरिएको छ ।
निर्वाचन आयोगको आयुक्तमा सगुनशमशेर जबरालाई नियुक्त गरिएको छ भने राष्ट्रिय प्राकृतिक श्रोत तथा वित्त आयोगको सदस्यमा विपिनराज निरौलालाई नियुक्त गरिएको छ ।
त्यसैगरी, राष्ट्रिय महिला आयोगको सदस्यहरूमा जया घिमिरे र सावित्राकुमारी शर्मालाई तथा राष्ट्रिय दलित आयोगको सदस्यमा सुन्दर पुर्कुटीलाई नियुक्त गरिएको छ ।
राष्ट्रिय समावेशी आयोगमा डा. रामकृष्ण तिमल्सेना, पुष्पराज तिमल्सेना र मानप्रसाद खत्रीलाई नियुक्त गरिएको छ भने आदिवासी जनजाति आयोगको सदस्यमा सूर्यबहादुर गुरुङलाई नियुक्त गरिएको छ ।
एवम् प्रकारले मधेसी आयोगको सदस्यमा आभाकुमारी, थारू आयोगमा डा. उमाशङ्कर प्रसाद चौधरी र शान्ति मोदी तथा मुस्लिम आयोगमा मोहम्मद समसुल हकलाई चयन गरिएको विज्ञप्तिमा उल्लेख छ ।
