काठमाडौं । सप्तरीकी नौ वर्षीया एक बालिकाको बलात्कारपछि हत्या भएको छ । डाक्नेश्वरी नगरपालिका–३ की ९ वर्षीया शिवानी यादवको बलात्कार पछि हत्या भएको हो ।
यही असार ४ गते बिहान साढे ९ बजे स्थानीय शिवनाथ यादवको आँप बगैंचामा घाँटी रेटिएको अवस्थामा शिवानीको शव फेला परेको थियो । हत्या आरोपमा प्रहरीले स्थानीय १९ वर्षीय रोहित यादवलाई प्रहरीले पक्राउ गरेको छ ।
प्रहरीका अनुसार गत शुक्रबार बिहान साढे ७ बजे शिवानी आफ्नी ५ वर्षीया बहिनी सन्ध्यासँग बाख्रा चराउन र घाँस काट्न घरबाट निस्केकी थिइन्।
बहिनीलाई बाख्रा हेर्न लगाएर आँप टिप्न बगैँचामा पसेकी शिवानीलाई आँप टिपिदिने प्रलोभनमा पारेकार रोहितले उनीमाथि जवर्जस्ती करणी गरेका थिए ।
शिवानीलाई एक्लै भएको मौकाछोपी रोहितले बलात्कार गरेको र शिवानीले आमालाई भनिदिने बताएपछि उनकै हातमा रहेको हँसियाले घाँटी रेटी हत्या गरेको बयान प्रहरीसमक्ष दिएका हुन् ।
