काठमाडौं । कोरोना संक्रमितको संख्या धेरै हुने जिल्लामा काठमाडौंलाई बागलुङले उछिनेको छ । आज सबैभन्दा धेरै कोरोना संक्रमित बागलुङमा देखिएका छन् ।

गएको २४ घण्टामा काठमाडौंमा २८५ जनामा संक्रमण पुष्टि भएको छ भने बागलुङमा ३०५ जनामा संक्रमण देखिएको स्वास्थ्य तथा जनसंख्या मन्त्रालयले जनाएको छ ।

आज काठमाडौं उपत्यकामा काठमाडौं २८५, ललितपुर ३५ र भक्तपुर ३३ जना गरी ३५३ जनामा संक्रमण देखिएको छ । यस्तै, देशभर २ हजार २९७ जनामा कोरोना संक्रमण पुष्टि भएको छ भने ३ हजार १३० जना संक्रमणमुक्त भएका छन् ।

आज ४६ जनाको मृत्यु भएको छ ।
स्वास्थ्य तथा जनसंख्या मन्त्रालयले पछिल्लो समय शहरी क्षेत्रमा संक्रमण कम हुँदै गएको र ग्रामिण क्षेत्रमा बढेको जनाएको छ ।