काठमाडौं । नेपाली सेनाले बाढी पहिरोबाट प्रभावितहरुको खोज, उद्धार तथा राहत वितरण गरिरहेको छ । असार १ गते सिन्धुपाल्चोक लगायतका क्षेत्रमा आएको बाढी तथा पहिरोको जोखिमका परेका परिवारलाई कुशलतापूर्वक उद्धार गरेको नेपाली सेनाले लगातार खोज तथा उद्धार जारी राखेको छ ।
बिगत केही दिनदेखि परिरहेको अविरल वर्षाको कारण बाढी पहिरो र डुबानहरुबाट प्रभावित देशका विभिन्न स्थानहरुमा सेनाले आफ्नो जनशक्ति तथा श्रोत साधन प्रयोग गरि खोज, उद्धार एवम् राहत वितरण कार्यहरु सञ्चालन गरेको हो ।
पछिल्ला केही दिन यता सेनाले गरेको खोज तथा उद्धारका गतिविधिहरु यस्ता छन् ।
असार ४ गते
१) बाढी पहिरोको कारण विस्थापित भएका सिन्धुपाल्चोक जिल्ला, हेलम्बु गाउँपालिका–२ गणेशबगर ईलाकामा बसोवास गर्दै आएका ४३ जना र सुरक्षा गुल्म मेलम्ची वरपर बसोवास गर्दै आएका ६० जना गरि जम्मा १०३ जनालाई नेपाली सेनाको उद्धार टोलीले खाली जमीनमा अस्थायी बासस्थानको व्यवस्था गरि राहत सामाग्री वितरण गर्न सहयोग गरेको छ ।
२) मुस्ताङ जिल्लाको घरपझोङ्ग गाउँपालिका–४ स्याङ्ग गाउँ बस्तिमा स्याङ्ग खोलाको बहाव बढेको हुँदा खोलाको पानी बस्तीमा पस्न सक्ने देखिएकोले पूर्वतयारी अनुरुप खटिएको फौजले खोला किनारमा ग्याबिन जालिमा ढुङ्गा भर्ने कार्य गरेको छ ।
३)प्युठान जिल्लाको मल्लरानी गाउँपालिका–३ धरमपानीस्थित बर्वोट बस्ने हिराबहादुर विक छापेखोला तर्ने क्रममा खोलाले बगाई वेपत्ता भएकोमा निजको शव उद्धार कार्यमा खटिएका नेपाली सेनाको टोलीले सरुमारानी गाउँपालिका- १ बाङ्गेसालको मियावस्ती नजिक रहेको राप्ति नदीको बीच भागमा फेला पारेको छ ।
४) मनाङ जिल्लाको विभिन्न स्थानहरुमा बाढी पहिरोको कारण जोखिममा परेका ८१ जनालाई नेपाली सेनाको हेलिकप्टरद्वारा उद्धार गरि सुरक्षित स्थानमा लगिएको छ ।
असार ५ गते
१) सिन्धुपाल्चोक जिल्ला पाँचपोखरी गाउँपालिका–१ स्थित याङ्ग्री ईलाकाका बाढी पहिरो प्रभावित स्थानीयवासीहरुको लागि मेलम्चीबाट नेपाली सेनाको हेलिकप्टर मार्फत २९ जनालाई उद्धार गरि काठमाडौं ल्याइएको छ ।
२) सिन्धुपाल्चोक जिल्ला हेलम्बु गाउँपालिका–४ स्थित गल्थुम र माझिटार ईलाकामा नेपाली सेनाको उद्धार टोलीले बाढीबाट विस्थापित भएका परिवारहरुलाई बस्नको लागि दुई स्थानमा ७÷७ वटा गरी जम्मा १४ वटा अस्थायी बासस्थानको व्यवस्था गरेको छ ।
असार ६ गते
१) गृह मन्त्रालयबाट प्राप्त भएको राहत सामग्री चामल, दाल, चिनी, नुन तथा अन्य खाद्य वस्तु र पालरटेन्ट नेपाली सेनाको हेलिकप्टर मार्फत मनाङ जिल्लाको चामे, थाचे, ओडार, ताल तथा सिन्धुपाल्चोक जिल्लाको क्युल र अन्य स्थानहरुमा ढुवानी गरेको छ ।
