काठमाडौं । काठमाडौं उपत्यकामा निजी सवारीसाधन जोरविजोर नम्बरका आधारमा चलाउन पाइने भएको छ । अब जोर दिनमा जोर नम्बरका गाडी र विजोर दिनमा विजोर नम्बरका निजी गाडी चलाउन पाइने गरी निषेधाज्ञा खुकुलो बनाइएको हो ।
मंगलबारदेखि एक साताका लागि उपत्यकामा थप सहज बनाउँदै निषेधाज्ञा लम्ब्याउने निर्णय भएको भक्तपुरका प्रमुख जिल्ला अधिकारी प्रेमप्रसाद भट्टराईले जानकारी दिनुभयो ।
यस्तै पसल खोल्नका लागि पनि बार तोकिएको छ । पसलहरुको वर्गीकरण गरेर बार तोकिएको छ । धेरै भीडभाड हुने र जोखिमका व्यवसाय बन्द भए पनि अरु खुल्ला गर्ने निर्णय भएको उहाँले बताउनुभयो ।
खाद्यन्न, डेरी, फलफुल तथा तरकारी, माछामासु, डिपार्टमेन्ट स्टोर, स्टेशनरी लगायतका पसलहरु हरेक दिन बिहान ११ बजेसम्म खोल्न पाइने छ।
डिपार्टमेन्ट स्टोरका ग्रोसरी बाहेक, सपिङमल, खेलकुद सामाग्रीका पसल, कपडा, जुत्ता, फेन्सी, कस्मेटिक्स, गिफ्ट आइटम, टेलरिङहरु सोमबार, बुधबार र बिहान ११ बजेदेखि ४ बजेसम्म खुल्ने भएका छन्।
सुन पसल, भाँडा पसल, भान्साजन्य पसल, विद्युतीय घरायसी सामाग्रीका पसल, अटो मोवाइल, मोवाइल कम्प्युटरका पसलहरु आइतवार, मंगलवार र बिहीवार बिहान ११ बजेदेखि अपरान्ह ४ बजेसम्म सञ्चालन गर्न पाइने भएको छ।
