महेन्द्रनगर । महाकाली नदीमा आएको बाढीले निर्माणाधीन चार लेनको पक्की पुलका संरचना भत्काउन थालेको छ । महेन्द्रनगर र दोधारचाँदनी तथा भारतको बनबासा जोड्ने पुलको पहुँचमार्ग बाढीले बगाएको हो ।
तीन अर्ब ६७ करोडको लागतमा निर्माणाधीन पुलको पहुँचमार्ग बाढीले भत्काउनुका साथै दोधारा चादँनीसित जोड्ने अस्थायी बाटोसमेत अवरुद्ध गराएको कञ्चनपुर प्रहरीले जनाएको छ । चार लेन पुलको बाटो नदीले कटान गर्दा आवातजावत बन्द भएको छ ।
त्यसैगरी पुलअन्तर्गत महाकालीमा निर्माण गरिएको टापु (आइल्याण्ड) समेत बगाएको पुल निर्माण कम्पनीले जनाएको छ । कुमार–सीएसईसी जेभीका इन्जिनियर किशोरराज पाण्डेयले पुल संरचनामा बाढीले क्षति पुग्दा करोडौं रकम बराबरको नोक्सान भएको बताउनुभयो । गत जेठमा पनि बाढी आउँदा रु तीन करोडभन्दा बढीको क्षति भएको रकालोपत्र गर्न स्थापना गरिएको प्लान्ट नै बगाएको उहाँले जानकारी दिनुभयो ।
अहिले पनि पहुँचमार्ग, टापुलगायतका संरचनामा बाढीले क्षति पु¥याएको बताउँदै तत्काल निर्माणको काम प्रभावित हुने इन्जिनियर पाण्डेले बताउनुभयो ।
दोधारा चाँदनीमा १५ घर डुबानमा
महाकाली नदीको पानीको बहाव बढेसँगै कञ्चनपुरको दोधारा चाँदनी नगरपालिका–१० कुतियाकभर बैदीफाँटाका १५ घर डुबानमा परेका छन् । राति २ः४५ बजे नदीको पानीले बस्ती डुबानमा पारेपछि स्थानीय बासिन्दालाई उद्धार गरी सुरक्षित स्थानमा सारिएको छ ।
सशस्त्र प्रहरीको बोर्डर आउट पोष्ट कुतियाकभरबाट उद्धार सामग्रीसहितको टोली, दोधारा चाँदनीस्थित बोर्डर आउट पोष्टको टोली तथा नेपाल प्रहरी र स्थानीय बासिन्दाको सहयोगमा डुबानमा परेका परिवारलाई सुरक्षित स्थानमा स्थानान्तरण गरिएको छ ।
महाकाली नदी बाढीको पानीले जोगबुढा नदीको पानी थुनिँदा कुतियाकभरका बस्तीमा पानी छिरेको बताइएको छ ।
ऐरीघाटका १० पविार विस्थापित
नदीमा पानीको बहाव बढे पछि यता, भीमदत्त नगरपालिका–१२ ऐरीघाटका १० घर डुवानमा परेका छन् । महाकाली नदी गाउँमा पसेपछि ऐरीघाटका १० घर डुवानमा परेको भीमदत्त नगरपालिका–१२ का वडाध्यक्ष कृष्णसिंह देउपाले जानकारी दिनुभयो ।
यद्यपी महाकाली नदीको पानी भुजेला खोलातर्फ मोड्ने जाली अहिले हटाएकाले भुजेला खोलामा महाकाली नदीको पानी आउन रोकिएको उहाँको भनाई छ ।
महाकाली नदीमा पानीको बहाव आज दुई लाख २३ हजार २०० क्युसेक पुगेको छ । इलाका प्रहरी कार्यालय गड्डाचौकीका अनुसार शनिबारदेखि महाकाली नदीमा पानीको बहावमा उतारचढाव आइरहेको छ ।
महाकालीमा बहाव बढेसँगै स्थानीय खोला थुनिदा छेउछाउका बस्ती जलमग्न भएका हुन् । स्थानीय प्रशासनले तटीय क्षेत्रका नागरिकलाई सतर्कता अपनाउन आग्रह गरेको छ ।
