दिनेश रैदास, दाङ ।।
बितेको तीन दिनदेखि परेको अविरल वर्षका कारण सिङ्गो दाङ प्रभावित भएको छ । यस क्रममा दाङको कालाकाटे, गढवा, बेला, राजपुर सहायक सडकको दुलैया चोकदेखि १०० मिटर पूर्व अवस्थित रामफकिरे रैदासको घर डुबानमा परी क्षति पुगेको छ ।
उक्त सडक आयोजनाले पुरानो कल्भटलाई हालै भत्काएर सडक निर्माण कार्य रोकेकाले दक्षिणदेखि उत्तर बग्ने पानीको बहाव रोकिँदा डुबान भएको पीडित रैदासले बताए।
अविरल वर्षाका कारण राप्ती नदीमा भएको भिषण बाढीले प्रगन्न सिँचाइ नहरको बह्रखुटी खेत कुलोको मुहान भालुबाङ हनुमानगढीमा पुरिँदा करोडौँको क्षति भएको छ । उक्त सिँचाइ नहरले राप्ती गाउँपालिका पाखापानीस्थित बनखेत रामनगर, पचहा, लालमटिया, सुँगुरे, मझ्निगढ, पिपर्खुट्टी, कालापानी, कोहोलालगायतका हजारौँ हेक्टर खेत सिँचाइ हुने नहरको मुहान क्षत्विक्षत् भएको छ ।
त्यसैगरी, प्रगन्न सिँचाइ नहरको ३ नं. इन्टेक मझेरिया मुहानमा मापदण्ड विपरीत नदीजन्य पदार्थ ढुङ्गा, गिट्टी, बालुवा उत्खनन् गरेका कारण उक्त नहरको मुहानबाट राप्ती नदी सिधै खुरुरिया बसन्तपुर, मानपुर मझेरिया, सगरापुर, बगरापुरलगायतका गाउँमा बहाव हुँदा ठुलो नोक्सानी भइरहेको स्थानीयले बताएका छन् ।
एवम् प्रकारले राप्तीनदीमा आएको बाढीले गोबरडिहा, गङ्गापरस्पुर, गढवा, चैलाही, बेला, सतबरिया, राजपुरलगायतका विभिन्न नदीतटीय बस्ती डुबान गरी करोडौँ खेती तथा भौतिक संरचनामा क्षति पुगेको छ ।
त्यसैगरी दक्षिण चुरेबाट बग्ने महातेनी खोला र कुरिया खोलामा आएको बाढीले धार परिवर्तन गर्दा राजपुर गाउँपालिका वडा नं. ५ को नौंसराका दर्जनौँ घर तथा खेतीयोग्य जमिन कटान भएको स्थानय गाउँलेहरूले बताएका छन् ।
यसैबिच, लमही नगरपालिका सतबरिया, हसनापुर, राजपुर गाउँपालिकाको वडा नं. २ मटेरियाको बिचमा रहेको राप्ती नदीको टापुमा मङ्गलबार भैँसी चराउन गएका चार जना स्थानीयहरू फसेको सशस्त्र प्रहरी बल २९ नं. जिल्ला हेडक्वाटर भालुबाङ, नेपाली सेना, इलाका प्रहरी कार्यालय गढवा, वडाप्रहरी कार्यालय लमहीसमेतको उद्धार टोलीले सकुशल उद्धार गरेको र सशस्त्र प्रहरी बलका २९ नं. गण भालुवाङका गणपति टोपेन्द्र खनालले जानकारी दिनुभएको छ ।
