काठमाडौं । कपिलवस्तुमा करिब एक महिना अघि भएको माओवादी नेता दीपक पाण्डेको हत्या उनकै श्रीमती महिमा भण्डारीको योजनामा भएको खुलेको छ ।
महिमाले तीन वर्ष पहिलेदेखि नै हत्याको योजना बनाएको कपिलवस्तु प्रहरीले जनाएको छ । सोमबार हत्यामा संलग्न महिमालाई प्रहरीले सार्वजनिक गरेको छ । हत्या अनैतिक सम्बन्धका कारण भएको प्रहरीको दाबी छ ।
माओवादी केन्द्रका स्थानीय नेता ३४ वर्षीय पाण्डे कपिलवस्तु नगरपालिका—३ का स्थायी बासिन्दा हुन् । कपिलवस्तु नगरपालिका—६ स्थित तौलिहवा–जितपुर सडकखण्डको गोबरीमा जेठ ५ गते राति ११ बजे उनीसहित दुई जनामाथि गोली प्रहार भएको थियो ।
लु १६ प ३४९७ नम्बरको मोटरसाइकलमा सवार तीन जनाले पेस्तोलबाट तीन राउण्ड गोली प्रहार गरेर फरार भएका थिए । पेटमा ३ गोली लागेका पाण्डेको अवस्था गम्भीर भएपछि थप उपचारका लागि काठमाडौं ल्याइएको थियो उनको त्रिवि शिक्षण अस्पताल महाराजगन्जमा जेठ १० गते उपचारको क्रमममा मृत्यु भएको थियो । उनीसँगै गोली लागेका इयाजको अवस्था भने सामान्य थियो ।
कपिलवस्तु नगरपालिका १ आनन्दबागका ३९ वर्षीय प्रकाश भनिने ओमप्रकाश यादव र पाण्डेकी श्रीमती महिमाबीच पछिल्लो पाँच वर्षयता अनैतिक यौन सम्बन्ध रहेको प्रहरीले जनाएको छ । यसबारे ३ वर्ष पहिला दीपकले थाहा पाएपछि श्रीमान श्रीमतीबीच झगडा सुरु भएको थियो ।
सोही कारण महिमाले ओमप्रकाशसँग मिलेर दीपकको हत्या योजना बुनेकी थिइन् । प्रहरीका अनुसार ओमप्रकाशले रमजान साहु मुसलमानलाई हत्याको लागि १ लाख रुपैयाँ बुझाएका थिए ।
पाण्डेको हत्यामा संलग्न रहेको आरोपमा प्रहरीले ११ जनालाई पक्राउ गरेको छ । उनीहरुमाथि प्रहरीले हातहतियार तथा खरखजना, ज्यान मार्ने उद्योग, कर्तव्य ज्यान र संगठित अपराधको कसुरमा अनुसन्धाान अगाडि बढाएको छ ।
