बाग्लुङ । नेपाल कम्युनिष्ट पार्टी (मसाल) बाग्लुङले केही दिन अघि ढोरपाटनमा घटेको घटनाप्रति पार्टीको कुनै संलग्नता नरहेको स्पष्ट पारेको छ । नेकपा (मसाल) बाग्लुङका प्रवक्ता मेकबहादुर पाइजाले मंगलबार एक वक्तव्य प्रकासित गरी घटनाप्रति दुःख व्यक्त गर्दै संलग्नमाथि कडा कारबाहीको माग गर्नुभएको छ ।

यही कात्तिक १२ गते ढोरपाटनमा स्थानीय गाउँलेहरुबीच भएको झगडामा मसाल समर्थक केही कार्यकर्ता घाइते भएका थिए । सो विषयलाई लिएर कतिपय सञ्चारमाध्यमले राष्ट्रिय जनमोर्चाको संस्थापन पक्षले अल्पमत पक्षलाई योजनाबद्धरुपमा कुटपिट गरेको भन्दै भ्रम छर्ने प्रयास गरेका थिए । ति प्रायोजित समाचारमा राजमोको संस्थापन पक्षले अल्पमत पक्षलाई ‘गौंडा कुरेर हत्या योजना बनाएको’ जस्ता मनगढन्ते कुराहरु समेत समावेश गरिएको थियो ।

मसालका जिल्ला प्रवक्ता पाइजाले प्रेसित गर्नुभएको वक्तव्यमा सो घटनामा आफ्नो पार्टीको कुनै संलग्नता नरहेको र पार्टीमा कुनै संस्थापन वा बहुमत अल्पमत पक्ष पनि नरहेको स्पष्ट पार्नुभएको छ ।

यस्तो छ वक्तव्यः
‘मिति २०७६ कार्तिक १२ गते ढोरपाटन नगरपालिका वडा नं. ४ धिरीमा घटेको घटनाप्रति नेपाल कम्युनिष्ट पार्टी (मसाल) जिल्ला समिति, बागलुङले दुःख प्रकट गर्दछ । साथै त्यस घटनामा घाइते हुनुभएका कामरेडहरुको सिघ्र स्वास्थ्य लाभको कामना गर्दै घटनामा संलग्न दोषीमाथि कडा भन्दा कडा कारबाहीको माग गर्दछौँ ।

यसै घटनासँग जोडेर कतिपय मिडियाहरुमा हाम्रो पार्टीको संस्थापन पक्ष र अल्पमत पक्षबीचको झगडा भएको र त्यसमा पार्टीका संस्थापन पक्षले अल्पमत पक्षमा विचार राख्ने माथि आक्रमण गरिएको भन्ने समाचार कपोकल्पित र झुट भएको स्पष्ट गर्न चाहान्छौँ। हाम्रो पार्टीको आठौं महाधिवेशन सम्पन्न भए पछि अहिले हाम्रो पार्टीमा संस्थापन र अल्पमत पक्ष केही नभएको समेत स्पष्ट गर्दछौँ । यस्तो अवस्थामा समाचारमा उल्लेख भए जस्तो पार्टीको संलग्नता नभएको छर्लङ्ग हुन्छ ।

हाम्रो पार्टीको संगठनात्मक पद्दति भूमिगत रहेकाले जिल्ला सेक्रेटरी को हो भन्नेबारे समेत हामीले सार्वजनिक गरेका छैनौँ । यस परिस्थितिमा समाचारमा उल्लेख भए जस्तै जिल्ला सेक्रेटरी भनी उहाँको संलग्नता रहेको भन्ने विषय पनि झुट रहेको स्पष्ट पार्न चाहान्छौँ । हामी यो यथार्थतालाई बुझेर सत्य तथ्य बुझी समाचार प्रकाशन र प्रसारण गर्न सम्बन्धित मिडियाहरुलाई अनुरोध गर्न चाहान्छौँ ।’