काठमाडौँ । नेपाल पत्रकार महासङ्घ कास्कीका सदस्य यज्ञप्रसाद बास्तोलाको कोरोना सङ्क्रमणका कारण ७० वर्षको उमेरमा निधन भएकोमा श्रद्धाञ्जली तथा शोकसन्तप्त परिवारप्रति गहिरो समवेदना प्रकट गरेको छ ।
महासचिव रोसन पुरीले २०७८ जेठ २७ गते प्रेसवक्तव्य जारी गर्दै पत्रकार महासङ्घ स्तब्ध भएको बताइएको हो ।
सङ्क्रमण पुष्टि भएपछि पोखरास्थित रिजनल अस्पतालमा उपचाररत पत्रकार बास्तोलाको स्वास्थ्यमा थप समस्या देखिएपछि बुधबार पोखराकै चरक अस्पतालमा उपचारका लागि भर्ना गरिएको थियो । उपचारकै क्रममा सोही अस्पतालमा आज बिहान ३ः१० बजे उहाँको निधन भएको थियो ।
बास्तोलाका दुई श्रीमती, तीन छोरा र एक छोरी रहेका छन् ।
कास्कीको पुरञ्चौरमा जन्मिई हाल पोखरा–५ का स्थायी वासिन्दा पत्रकार बास्तोला विगत चार दशकदेखि पोखरामा रही पत्रकारितामा क्रियाशील हुनुहुन्थ्यो । उहाँले पोखराको माछापुच्छ्रे एफएम, माइक्रो न्युज, आदर्श समाज र स्वतन्त्र सन्देशलगायतमा कार्यक्रम प्रस्तोतादेखि सहसम्पादक र सम्पादकको जिम्मेवारी निर्वाह गर्नुभएको थियो ।
महासङ्घले भनेको छ– “उहाँको निधनले नेपाली पत्रकारिता क्षेत्रले एक कुशल र अनुभवी पत्रकार गुमाएको छ भने महासङ्घले जुझारु र सक्रिय सदस्य गुमाएको छ ।”
महासङ्घले हालसम्म कोरोनाकै कारण २० जना पत्रकारको निधन भएको र ९५० भन्दा बढी पत्रकार सङ्क्रमित भएको जानकारी दिएको छ
