काठमाडौं । स्वास्थ्य तथा जनसंख्या मन्त्री शेरबहादुर तामाङले सम्पति विवरण सार्वजनिक गर्नुभएको छ । मन्त्री तामाङले सार्वजनिक गरेको सम्पत्ति विवरण अनुसार आफ्नो र श्रीमतीको नाममा गरी विभिन्न ठाउँमा १४ कित्ता जग्गाजमिन रहेको छ ।
तामाङको सिन्धुपाल्चोकको सिन्धुकोट र मेलम्चीमा गरी झन्डै १८ रोपनी जग्गा रहेको छ भने श्रीमती उषाकला राईको नाममा काठमाडौंको जोरपाटीमा ३ आनामा बनेको अढाई तले घर सहित पूर्वका विभिन्न जिल्लामा ११ स्थानमा जग्गा जमिन रहेको छ ।
तामाङको काठामाडौंमा ६ आना २ पैसा १ दाम जग्गा रहेको छ । यस्तै तामाङको २२ तोला सुन रहेको छ । यस्तै तामाङको एभरेष्ट बैंक सिंहदरबार शाखामा तलब भत्ता बापतको २ लाख १६ हजार १ सय २५ रुपैयाँ रहेको भने श्रीमती राईको दुईवटा बैंकमा १ लाख ६ हजार २ सय २५ रुपैयाँ रहेको छ ।
तामाङको विभिन्न कम्पनीमा ५ लाख रुपैयाँको शेयर रहेको छ भने श्रीमती राईको नाममा १५ लाख रुपैयाँको शेयर रहेको छ । यस्तै तामाङसँग एउटा कार र मोटरसाइकल रहेको छ भने श्रीमती राईको पनि एउटा कार रहेको छ । २ थान ल्यापटप र ३ थान मोबाइल रहेको विवरणमा जनाइएको छ ।
कृषि विकास बैंकमा १६ लाख र अन्यमा १९ लाख ऋण भएको विवरणमा उल्लेख छ ।
हेरौं सम्पति विवरण
