काठमाडौं । काठमाडौं उपत्यकामा पछिल्ला केही दिन यता कोरोना भाइरसको संक्रमण घट्दै गएको छ । स्वास्थ्य तथा जनसंख्या मन्त्रालयले उपत्यकालगायत शहरी क्षेत्रमा संक्रमण घट्दै गएको र ग्रामिण क्षेत्रमा बढ्दै गएको जनाएको छ ।
बुधबार गरेको नियमित प्रेस ब्रिफिङका क्रममा मन्त्रालयले काठमाडौं उपत्यकामा पछिल्लो २४ घण्टामा ९१५ संक्रमित थपिएको जनाएको छ । जसमा काठमाडौंमा ६७९, भक्तपुरमा ८५ र ललितपुरमा १५१ जना नयाँ संक्रमित थपिएका हुन् ।
यस्तै, हिजो काठमाडौं उपत्यकामा १ हजार २२६ संक्रमित थपिएका थिए ।मन्त्रालयका अनुसार काठमाडौं उपत्यकामा संक्रमण दर घट्दै गएको छ ।
त्यसो त पछिल्ला केही दिन यता देशैभर संक्रमण दर घट्दै गएको छ । आज नेपालमा ४ हजार ३४४ जनामा कोरोना भाइरसको संक्रमण पुष्टि भएको छ भने हिजो हिजो देशभर ५ हजार १५३ जनामा संक्रमण पुष्टि भएको थियो ।
मन्त्रालयका अनुसार देशभरका ४६ जिल्लामा ५ सय भन्दा धेरै सक्रिय संक्रमित छन् । आज देशभरका ८० हजार ३३६ जना सक्रिय संक्रमित रहेको तथ्यांकमा उल्लेख छ ।
मन्त्रालयले प्रदेश १ को पाँचथर, ओखलढुंगा, तेह्रथुम, प्रदेश २ को सिरहा, वागमती प्रदेशमा सिन्धुली र नुवाकोट, गण्डकी प्रदेशमा नवलपरासी पूर्व, लुम्बिीनीको रोल्पा, कर्णालीको रुकुम पश्चिम र सुदूरपश्चिमको दार्चुलामा संक्रमण बढ्दै गएको जनाएको छ।
मन्त्रालयका अनुसार आज १ हजार ३१२ जना आईसीयूमा उपचारत रहेकेमा ३७५ भेन्टिलेटरमा छन् । आज ८१ जनाको निधन भएको छ। आजसम्म नेपालमा कोरोना संक्रमणका कारण ८ हजार १७९ जनाको ज्यान गएको छ ।
