नयाँदिल्ली । भारतमा सोमबार एक लाखभन्दा कम व्यक्तिमा कोरोना सङ्क्रमण देखा परेको छ । गत २४ घण्टामा भारतमा थप ८६ हजार ४९८ थप व्यक्तिको कोरोना सङ्क्रमण भएको छ । कोरोना सङ्क्रमितको यो सङ्ख्या ६३ दिनयताको सबैभन्दा कम हो ।
कोरोना सङ्क्रमण सुरु भएयता यहाँ सङ्क्रमितको जम्मा सङ्ख्या २ करोड ९० लाख ९७ हजार १०९ पुगेको केन्द्रीय स्वास्थ्य तथा परिवार कल्याण मन्त्रालय मङ्गलबार जानकारी दिएको छ । त्यसैगरी, भारतमा कोरोना सङ्क्रमणको कारण ज्यान गुमाउने व्यक्तिको सङ्ख्यामा सोचेजस्तो कमी नआए तापनि केही समययता यस प्रकोपको कारण ज्यान गुमाउने पनि केही कम भने भएको मन्त्रालयले मङ्गलबार जानकारी दिएको छ ।
भारतमा गत २४ घण्टामा २ हजार १२३ जनाको कोरोना सङ्क्रमणबाट मृत्यु भएपछि यहाँ कोरोनाबाट मृत्यु भएका व्यक्तिको सङ्ख्या ३ लाख ५१ हजार ३०९ पुगेको छ । गत २४ घण्टामा भारतमा १ लाख ८२ हजार २८२ जना सङ्क्रमित कोरोना मुक्त भएका छन् । यसैसँग भारतमा हालसम्म २ करोड ७३ लाख ४१ हजार ४६२ जना व्यक्ति कोरोना मुक्त भएका छन् ।
हाल यहाँ १३ लाख ३ हजार ७०२ जना सक्रिय सङ्क्रमित रहेका छन् । भारतमा जुन ६ तारिखसम्म ३६ करोड ६३ लाख ३४ हार १११ जनाको कोरोना परिक्षण गरेको सरकारी स्रोतले जानकारी दिएको छ ।
गत जनवरी १६ तारिखबाट यहाँ कोरोना भाइरस विरुद्ध खोपको अभियान सुरु भएको थियो । सो समयदेखि हालसम्म कोरोना भाइरस विरुद्ध २३ करोड ६१ लाख ९८ हजार ७२६ डोज खोप लगाइएको छ । (रासस/सिन्ह्वा)
