काठमाडौँ । प्राकृतिक चिकित्सक डा. हरिप्रसादले रोगप्रतिरोधी क्षमता बढाउन सके जुनसुकै भाइरसलाई पनि जित्न सकिने विश्वास दिलाउनुभएको छ ।
‘रोगप्रतिरोधी क्षमता बढाइयो भने हामीले जुनसुकै भाइरसलाई पनि जित्न सक्छौँ’ उहाँले भन्नुभयो– ‘अहिले कोरोना भाइरस मात्रै होइन, भविष्यमा आउने अरू भाइरसजन्य सङ्क्रमणलाई हामी जित्न सक्छौँ ।
डा. हरिप्रसाद प्रगतिशील लेखक सङ्घको आयोजनामा २०७८ जेठ २३ गते आयोजित “कोरोना रोकथाम, उपचार र हाम्रो जीवनशैली” शीर्षकको भर्चुअल अन्तरक्रियामा विचार व्यक्त गर्दै हुनुहुन्थ्यो ।
उहाँले रोगप्रतिरोधी क्षमताको विकासका लागि खाना, व्यायाम र तनाव व्यवस्थापन आवश्यक रहेको बताउनुभयो ।
नेपाली भान्सा अहिले धेरै नै विकृत हुँदै गएको उहाँले बताउनुभयो । ‘हाम्रो भान्साका मसला पहिला जीवनदायिनी थियो, अहिले विस्तारै मृत्युदायिनी बन्दै गएको छ’ उहाँले भन्नुभयो । डा. हरिप्रसादले नेपाली भान्साको बारेमा ५० भन्दा बढी विद्यावारिधी पूरा गर्न सकिने बताउनुभयो ।
‘बजार रङ्गीचङ्गी छ, हामी पनि कम रङ्गीचङ्गी छैनौँ’ उहाँले भन्नुभयो– ‘त्यसले गर्दा हाम्रो जीवनको रङ उडेको छ ।’
उहाँले रासायनिक मल, कीटनाशक औषधि र हर्मोनको प्रयोगले हाम्रो खाद्यपदार्थ दुषित भएको बताउँदै उहाँले भन्नुभयो– ‘खानाका लागि घर (होम) बाट होटलतर्फ जानु भनेको अन्ततः हस्पिटल (अस्पताल) तर्फ पुग्नु हो ।’
डा. हरिप्रसादले जीव, जीवन र जगत्का लागि प्रकृतितर्फ फर्किन आह्वान गर्नुभयो । प्रकृतिलाई बेवास्ता गर्दा आँखाले देख्न नसक्ने विषाणु (भाइरस) ले सिङ्गै मानव समुदायलाई आक्रान्त बनाएको बताउनुभयो ।
प्रकृतिप्रति असन्तुलित रवैया कायम गर्दा के हुन सक्छ सम्बन्धमा उहाँले माहुरीको उदाहरण दिनुभयो । ‘यो प्रकृतिबाट माहुरी नहुने हो भने परागसेचनको अभावमा अहिलेको कृषि उत्पादन ५५ प्रतिशतसम्म घट्ने छ’ उहाँको भनाइ थियो ।
रोग लागिसकेपछि बिरामीको उपचारमा एलेप्याथीको ठुलो योगदान रहेको बताउँदै उहाँले खानपानमा ध्यान दिने हो भने नसर्ने खालका रोगको सङ्क्रमणलाई धेरै न्यूनीकरण गर्न सकिने विश्वास उहाँले व्यक्त गर्नुभयो ।
कार्यक्रम अध्यक्ष प्राडा जीवेन्द्र देव गिरीको अध्यक्षता तथा महासचिव समीर सिंहको सञ्चालनमा अघि बढेको थियो ।
समीर सिंह र डा. लेखप्रसाद निरौलाले डा. हरिप्रसादसित केही जिज्ञासा राख्नुभएको थियो ।
