काठमाडौँ । ब्राजिलमा कोभिडबाट सङ्क्रमितको मृत्युदर यथावत नै रहेको छ । कोरोनाको दोस्रो लहर भेरियन्टको दौरानमा यस खालको स्थिति देखा परेको छ ।
वल्र्डोमिटर्सका अनुसार त्यहाँ हिजो जुन ४, २०२१ का दिन ३८ हजार ४८२ जना सङ्क्रमित हुँदा १ हजार १८४ जनाको मृत्यु भएको छ अर्थात् त्यहाँ सङ्क्रमितको तुलनामा मृत्युदर अझै पनि घटेको छैन ।
ब्राजिल सङ्क्रमितको विश्व तथ्याङ्कमा तेस्रो स्थानमा छ । आजसम्म त्यहाँ कुल सङ्क्रमितको तथ्याङ्क एक करोड ६८ लाख ४१ हजार ९५४ पुगेको छ भने हालसम्म ४ लाख ७० हजार ९६८ जनाको मृत्यु भएको छ ।
सङ्क्रमितमध्ये १ करोड ५२ लाख ३९ हजार ६८२ जना निको भएर घर फर्किसकेका छन् । ११ लाख ३१ हजार २९४ जना सक्रिय सङ्क्रमित रहेको ब्राजिलमा गम्भीर बिरामीको सङ्ख्या ८ हजार ३१८ रहेको छ ।
गत तीन दिनको तथ्याङ्क हेर्ने हो भने ब्राजिलमा जुन ३ का दिन ८३ हजार ३९१ जना सङ्क्रमित हुँदा २ हजार ७८ जनाको मृत्यु भएको, जुन २ का दिन ९४ हजार ५०९ जना सङ्क्रमित हुँदा २ हजार ३९४ जनाको मृत्यु भएको र जुन १ का दिन ७७ हजार ८९८ जना सङ्क्रमित हुँदा २ हजार ३४६ जनाको मृत्यु भएको थियो ।
