टोकियो । विश्व स्वास्थ्य सङ्गठन (डब्लुएचओ) ले दक्षिणपूर्वी एसियाली मुलुक भियतनाममा देखिएको कोरोना हाइब्रिड भेरियन्ट नभएको बताएको छ ।
जापानी समाचार पत्र निक्कीसँग कुरा गर्दै भियतनामस्थित डब्लुएचओका प्रतिनिधिले यो भाइरस भारतमै भेटिएको डेल्टा भेरियन्टको प्रकार भएको बताएका छन् ।
‘डब्लुएचको परिभाषानुसार अहिले भियतनाममा कोरोनाको कुनै हाइब्रिड भेरियन्ट छैन’ डब्लुएचओका भियतनाम प्रतिनिधि किदोङ पार्कले भने।
यसअघि भियतनामका अधिकारीहरूले आफ्नो देशमा इन्डियन र युके भेरियन्ट दुबैको विशेषता भएको नयाँ भेरियन्ट फेला परेको बताएका थिए ।
भियतनामका स्वास्थ्यमन्त्री एनगुयन थान्ह लोङले उक्त भेरियन्टमा इन्डियन भेरियन्टजस्तो तीव्र म्युटेसन हुने र युके भेरियन्टजस्तो बढी
घातक हुने दुबै विशेषता रहेको बताए । यो भेरियन्टको हावाका माध्यमबाट छिटो फैलिने भएकाले निकै खतरनाक रहेको उनले बताए । खुला ठाउँमा पनि हावाबाट फैलिने हो कि बन्द कोठाभित्र फैलिने हो भन्नेबारे उनले केही खुलाएनन् ।
