काठमाडौँ । विश्वका विभिन्न देशमा कोरोनाको नयाँ भेरियन्ट देखिएजस्तै नेपालमा पनि “नेपाल भेरियन्ट” देखिएको भन्ने हल्लालाई स्वास्थ्य तथा जनसङ्ख्या मन्त्रालयले खारेज गरेको छ ।
पछिल्लो समय नेपालमा अल्फा बी.१.१.७०, डेल्टा बी.१.६१७.२ र कप्पा ९बी.१.६१७.१ भेरियन्ट देखिएको मन्त्रालयका प्रवक्ता डा. कृष्णप्रसाद पौडेलले जानकारी दिनुभयो । हाल यी भेरियन्टमध्ये डेल्टा बी.१.६१७.२ धेरै सङ्क्रमितमा देखिएको उनको भनाइ थियो ।
यी तीन वटै भेरियन्ट नेपाल भेरियन्ट नभएको उहाँको प्रष्टीकरण थियो ।
नेपालमा कोरोनाको छुट्टै नयाँ भेरियन्ट फैलिएको अन्र्तराष्ट्रिय सञ्चार माध्यममा चर्चा भए पनि सत्यता नभएको डा. पौडेलले जानकारी दिनुभयो ।
‘नेपालबाट गएका व्यक्तिमा डेल्टा बी.१.६१७.२ नयाँ भेरियन्ट देखिएको थियो होला’ उहाँको भनाइ थियो– ‘भारतीय भन्न खोजेको होला, नयाँ भेरियन्टको नाम डेल्टा राखिएको छ ।’
“नेपाल भेरियन्ट” भनेर विश्व स्वास्थ्य सङ्गठनले समेत नभनेको हुँदा विश्वास नगर्न उहाँको आग्रह छ ।
