काठमाडौं । डोटीको आदर्श गाउँपालिका–४ रोडिकी २८ वर्षीया लक्ष्मी भाट र उनकी छोरी अन्जु भाटको उपचार सरकारले नै गर्ने भएको छ । सोमबार विज्ञप्ति प्रकाशित गरी गृह मन्त्रालयले घाइतेको उपचार लागेको सम्पूर्ण खर्च सरकारले नै ब्यहोर्ने जनाएको छ ।
यही जेठ १२ गते राति आफ्नै घरमा सुतिरहेका बेला प्रज्वलनशील पदार्थ छर्केर आगो लगाउँदा आमा छोरी घाइते भएका थिए । घटना लगत्तै लक्ष्मीका श्रीमान सन्तोष फरार भएका छन् ।
आमा छोरीलाई आज नेपाली सेनाको हेलिकप्टर मार्फत काठमाडौं ल्याइ कीर्तिपुरस्थित वर्न अस्पतलामा उपचार शुरु भएको गृहले जानकारी दिएको छ ।
अहिले लक्ष्मीको अवस्था खतरामुक्त भएको उपचारमा संलग्न वर्न अस्पतलाका चिकित्सक डा सुरेन्द्र बस्नेत र प्रकृति ज्ञवालीले जानकारी दिनुभएको छ । घटनालगत्तै फरार रहेका सन्तोषले नै घटना गराएको हुनसक्ने प्रहरीले अनुमान गरेको छ। उनको खोजी जारी रहेको जनाइको छ ।
मन्त्री आलेद्वारा उपचारमा सहयोग
वन तथा वातावरणमन्त्री प्रेमबहादुर आलेले आगलागीबाट जलेकी लक्ष्मीको उपचारका लागि रु २५ हजार सहयोग प्रदान गर्नु भएको छ ।
डोटीबाट सेनाको हेलिकोप्टरमा ल्याइएकी भाटलाई त्रिभुवन अन्तर्राष्ट्रिय विमानस्थलमा आफै पुग्नु भइ मन्त्री आलेले उपचारका लागि रकम प्रादन गर्नुभएको उहाँका प्रशासन सहायक भक्त आलेले जानकारी दिनुभयो ।
जिल्लामा उपचार सम्भव नभएपछि थप उपचारका लागि लक्ष्मीलाई आज मन्त्री आलेको पहलमा नेपाली हेलिकप्टर मार्फत काठमाडौं ल्याइ कीर्तिपुरस्थित वर्न अस्पतलामा उपचार शुरु भएको हो ।
