काठमाडौं । निजी रेडियोहरूको छाता संस्था ब्रोडकास्टिङ एसोसिएसन अफ नेपाल (बान) का अध्यक्ष चन्द्रप्रसाख न्यौपानेको कोरोना सङ्क्रमणका कारण ४७ वर्षको उमेरमा शुक्रबार बिहान निधन भएको छ ।
कोरोना सङ्क्रमण पुष्टि भएपछि १८ दिनदेखि विराटनगरको विराट मेडिकल कलेजमा उपचाररत न्यौपानेको स्वास्थ्यमा थप समस्या आएपछि केही दिनदेखि भेन्टिलेटरमा राखी उपचार भइरहेकोमा आज बिहान उपचारकै क्रममा निधन भएको हो । न्यौपानेका श्रीमती, एक छोरा र एक छोरी छन् ।
इटहरीस्थित सप्तकोशी एफएमका सञ्चालक तथा स्टेसन म्यानेजर रहेका न्योपौने नेपाल विज्ञापन बोर्डको सदस्यसमेत थिए ।
महासङ्घको एसोसिएट संस्था नेपाल पर्यटन पत्रकार मञ्चका सदस्यसमेत रहेका न्यौपानेको निधनप्रति नेपाल पत्रकार महासङ्घले गहिरो दुःख प्रकट गरेको छ । नेपालमा एफएम रेडियोको संस्थागत विकासका लागि महत्त्वपूर्ण भूमिका निर्वाह गर्दै आएका न्यौपानेको निधनले नेपाली पत्रकारिता क्षेत्रले एक कुशल, उर्जाशील र अनुभवी पत्रकार गुमाएको महासङ्घले जनाएको छ ।
महासङ्घका अनुसार कोरोनाकै कारण हालसम्म १७ जना पत्रकारको निधन भएको छ भने ८ सयभन्दा बढी पत्रकार सङ्क्रमित भएका छन् ।
महासङ्घले पछिल्लो केही दिनयता कोरोना सङ्क्रमणको दर बढिरहेको चुनौतीपूर्ण अवस्थामा सम्भावित जोखिमको ख्याल गरी सम्पूर्ण स्वास्थ्य सुरक्षाका उपायहरू अवलम्बन गर्दै पेशागत कर्ममा जुट्न सबै पत्रकारमा अपिल गरेको छ ।
