मलङ्गवा । कोभिड १९ को दोस्रो लहर व्यवस्थापनमा प्रभावकारी भूमिका नखेलेको भन्दै सर्लाहीका जनप्रतिनिधि र प्रमुख जिल्ला अधिकारीबिच विवाद बढेको छ ।

जिल्लामा कोरोना सङ्क्रमण समुदायस्तरमा फैलिएपछि जिल्लाका स्थानीय निकायका प्रमुखहरूले स्थानीय निकाय सिल गर्नुपर्ने सुझाव दिएअनुसार निर्णय नगर्दा जनप्रतिनिधि र प्रमुख जिल्ला अधिकारीबिच विवाद बढेको हो ।

जिल्लामा झन्डै तीन महिनाअघि सरुवा भएर आउनुभएका प्रमुख जिल्ला अधिकारी हेमराज तामाङले कोरोना महामारीमा निषेधाज्ञा लगाउनेबाहेक अरू कुनै पनि सहकार्य नगरेको जनप्रतिनिधिको आरोप छ । समुदाय स्तरमा सङ्क्रमण फैलिएसँगै अक्सिजनको ज्यान गुमाउनेको सङ्ख्या बढेपछि प्रमुख जिल्ला अधिकारीलाई अक्सिजनको अभाव टार्न पटक पटक आग्रह गरिए पनि समस्याको समाधानतर्फ कुनै पहल नभएको बरहथवा नगरपालिकाका प्रमुख देवानन्द महतोले बताउनुभयो ।

जिल्ला प्रशासन कार्यालयबाट कोरोना सङ्क्रमणतर्फ कुनै पहल नभएपछि लालबन्दी, हरिवन, बागमती र ईश्वरपुर नगरपालिका महामारीलाई रोक्न आफैँ व्यवस्थापनमा जुटेका छन् । लालबन्दीले २० सैयाको अक्सिजनसहितको अस्थायी कोरोना अस्पताल बनाएको छ भने हरिवनले १०० सैयाको अस्थायी कोरोना अस्पताल बनाएको छ ।

‘यो महामारीमा अक्सिजनको चाप रहेको बेला यसको व्यवस्थापन गर्न चुनौती छ’ प्रजिअ तामाङले भन्नुभयो ।

यस्तै, लालबन्दी नगरपालिका—९ मा रहेको प्राथमिक स्वास्थ्य केन्द्रमा अक्सिजनसहितको २० सैयाको अस्थायी कोरोना अस्पताल, हरिवन नगरपालिकाले १०० सैयाको अक्सिजनसहितको अस्थायी कोरोना अस्पताल निर्माण गरिसकेको छ । जिल्लाका केही स्थानीय निकायले स्वाब सङ्कलन र कन्ट्याक्ट ट्रेसिङलाई पनि प्राथमिकताका साथ सञ्चालन गरिरहेका छन् ।