काठमाडौँ । काठमाडौँ महानगरपालिकाको सहयोगमा छत्रपाटी निःशुल्क चिकित्सालयमा बुधबारदेखि विशेष कोभिड–१९ अस्पताल सञ्चालनमा आएको छ ।
दोस्रो लहरको कोरोना सङ्क्रमण बढ्दै गएपछि गत वैशाख ३१ गते महानगर र अस्पतालबिच आवश्यक सामग्री तथा रकम उपलब्ध गर्नेबारे सम्झौता भएको थियो । यसका लागि महानगरले पूर्वाधार सुधारका लागि एकमुष्ठ रु. ३० लाख ३४ हजार ७०० र मासिक सञ्चालन खर्चबापत करिब रु. ४८ लाख १६ हजार ६०० रकम सहयोग गरेको छ ।
सहरी विकास राज्यमन्त्री रामवीर मानन्धर र नगर प्रमुख विद्यासुन्दर शाक्यले संयुक्त रूपमा बुधबार अस्पताल सञ्चालनको आरम्भ गर्नुभएको हो । अस्पतालका निर्देशक डा. प्रेमकुमार जोशीका अनुसार अब अस्पतालमा सात आइसियु, चार भेन्टिलेटर, छ एचडियुसहित ३५ श्ययाको कोभिड अस्पताल सञ्चालनमा आएको छ ।
महानगरसँग भगिनी सम्बन्ध स्थापना भएको चीनको ल्हासा सहरबाट उपलब्ध भएको भेन्टिलेटरमध्ये दुई छत्रपाटी चिकित्सालयलाई यसअघि नै दिइएको छ । यसैगरी, अस्पतालले खरीद गर्ने थप तीन भेन्टिलेटरको रकम पनि महानगरले नै भुक्तानी गर्ने सहमति भएको छ ।
अस्पतालको पूर्वाधार सुधारका लागि करिब रु. ३० लाख खर्च गरेर लिफ्ट जडान गरिसकेको र नयाँ भवन निर्माण गर्न करिब रु. पाँच करोड विनियोजन गरेको नगर प्रमुख शाक्यले जानकारी दिनुभयो ।
गत वैशाख २५ गतेदेखि अहिलेसम्ममा महानगरले कोरोना नियन्त्रणका लागि आवश्यक यन्त्र उपकरण सहयोग गर्न भन्दै १२ अस्पतालसँग सम्झौता गरिसकेको छ । यसरी सम्झौताबमोजिम छत्रपाटी अस्पतालमा बुधबारदेखि कोभिड विशेष अस्पताल सञ्चालनमा आएको हो ।
यससँगै ८८ अक्सिजनसहित २०० सैयाको राधास्वामी कोभिड आइसोलेसन तथा अक्सिजन थेरापी सेन्टर, नरदेवी आयुर्वेद अस्पतालमा २५ सैयाको एचडियु र २५ सैयाको साधारण गरी ५० सैयाकोे आइसोलेसन सञ्चालनमा आइसकेका छन् ।
यस्तै विभिन्न अस्पतालमा ४२ भेन्टिलेटर र १० थान प्रेसर यन्त्र जडान हुँदै छन् ।
