काठमाडौँ । नेपाल पत्रकार महासङ्घले महासङ्घको लुम्बिनी प्रदेश समितिका सदस्य एवम् एभिन्युज टेलिभिजनका कपिलवस्तु संवाददाता गोपाल भण्डारीलाई समाचार सङ्कलनका क्रममा प्रमुख जिल्ला अधिकारी चक्रपाणि पाण्डेले दुर्व्यवहार गरेको आरोप लगाएको छ ।
महासङ्घका अनुसार जेठ ४ गते नागरिक समाजका तर्फबाट जिल्ला प्रशासन कार्यालय कपिलवस्तुमार्फत प्रधानमन्त्रीलाई ज्ञापनपत्र बुझाउने क्रममा समाचार सङ्कलनका लागि त्यहाँ पुगेका पत्रकार भण्डारीलाई प्रमुख जिल्ला अधिकारी पाण्डेले तस्बिर खिच्न रोक लगाउँदै दुर्व्यवहार गरेका थिए ।
“सार्वजनिक निकायमा बसेका जिम्मेवार व्यक्तिबाट स्वतन्त्र रूपमा पेसागत कर्ममा जुटिरहेका पत्रकारमाथि दुर्व्यवहार गरिनु आफैमा निन्दनीय र प्रेस विरोधी काम हो” महासङ्घले शुक्रबार विज्ञप्ति प्रकाशित गरी भनेको छ– “महासङ्घ प्रेसको संवैधानिक अधिकारको सम्मान गर्न र यस्ता घटना नदोर्याउन सम्बन्धित पक्षको ध्यानाकर्षण गराउँछ ।”
