बुटवल । रुपन्देहीका ६० वर्षीय पत्रकार हिक्मत चौधरीको कोरोना सङ्क्रमणका कारण निधन भएको छ । नेपाल पत्रकार महासङ्घ रुपन्देही शाखाका सदस्य चौधरीको उपचारका क्रममा बुधबार बिहान निधन भएको हो ।
कोरोना सङ्क्रमण पुष्टि भएपछि १० दिनदेखि रुपन्देहीको बुटवल धागो कारखानामा रहेको कोरोना विशेष अस्पतालमा उपचाररत चौधरीको स्वास्थ्यमा थप समस्या आएपछि दुई दिनदेखि भेन्टिलेटरमा राखी उपचार भइरहेकोमा आज बिहान उपचारकै क्रममा निधन भएको हो ।
चौधरीका श्रीमती, चार छोरी र दुई छोरा छन् ।
तिलोत्तमा–५ मणिग्राम निवासी पत्रकार चौधरीले रेडियो लुम्बिनीमा डेढ दशक काम गरेका थिए। उनको निधनले नेपाली पत्रकारिता क्षेत्रले एक कुशल र अनुभवी पत्रकार गुमाएको नेपाल पत्रकार महासङ्घले जनाएको छ ।
महासङ्घका अनुसार कोरोनाकै कारण हालसम्म १५ जना पत्रकारको निधन भएको छ भने ८ सयभन्दा बढी पत्रकार सङ्क्रमित भएका छन् ।
पछिल्लो केही दिनयता कोरोना सङ्क्रमणको दर बढिरहेको छ । कोरोना सङ्क्रमणको चुनौतीपूर्ण यो अवस्थामा सम्भावित जोखिमको ख्याल गरी सम्पूर्ण स्वास्थ्य सुरक्षाका उपायहरू अवलम्बन गर्दै पेशागत कर्ममा जुट्न महासङ्घले सबै पत्रकारमा अपिल गरेको छ ।
