काठमाडौं । पर्याप्त अक्सिजन नपाएपछि राजधानी लगायत देशका विभिन्न भागमा सञ्चालित अस्पतालहरुले कोरोना संक्रमितको उपचार गर्न नसकिने भन्दै हात झिक्न थालेका छन् । कतिपय अस्पतालले भर्ना भएका गम्भीर अवस्थाका बिरामीलाई समेत घर जान भनेका छन् ।

ललितपुर नख्खुस्थित नेपाल मेडिसिटी अस्पतालमा कोभिड–१९ र बिरामीको सुरक्षित उपचारमा अक्सिजनको अभाव भएको जनाएको छ । अस्पतालमा अहिले १२० भन्दाबढी कोरोना र १०० हाराहारीमा अन्य बिरामीको उपचार भइरहेको अस्पतालका प्रवक्ता डा. राज राणाले जानकारी दिनुभयो ।

४० भन्दा बढी भेन्टिलेटर सहित सघन उपचार कक्षमा रहेको उक्त अस्पतालले सम्पूर्ण क्षमता, जनशक्ति र संयन्त्रको उपयोग गरी कोभिडका बिरामीको उपचारमा गरिरहेको जनाएको छ ।

प्रत्येक दिन ४ सय पचास देखि ५ सय आवश्यक पर्नेमा १ सय सिलिण्डर मात्र अक्सिजन प्राप्त हुने गरेको जानकारी अस्पतालले दिँदै यस्तो परिस्थितिमा उपचार गर्न कठिनाई हुने भएकाले सहज आपूर्तिको व्यवस्था मिलाउन मन्त्रालय, सिसिएमसी र सम्बन्धित निकायसँग अपील गरेको छ । अक्सिजनको सहज आपूर्तिको सुनिश्चित नभएसम्म कोभिडका जटिल बिरामीको नयाँ भर्ना लिन असमर्थ रहेको अस्पतालले विज्ञप्ति मार्फत जनाएको छ ।

मध्यपुर अस्पतालले अब बिरामी भर्ना नलिने
यता, भक्तपुरको मध्यपुरथिमिस्थित मध्यपुर अस्पतालले पनि अक्सिजन सकिएको जनाउँदै अब कोभिड–१९ का बिरामीको उपचार नगर्ने जनाएको छ । अस्पतालका निर्देशक डा रवीना प्रधानाङ्गले आज विज्ञप्ति सार्वजनिक गर्दै मध्यपुर अस्पतालले अब कोभिडका नयाँ बिरामी भर्ना नलिने जनाउनुभयो ।

अस्पतालमा अक्सिजन सकिएको तर बिरामी आउने क्रम भने जारी रहेका अवस्थामा बिरामीको ज्यान जोखिममा पर्ने भएकाले सहज आपूर्ति नभएसम्म कोभिड र अक्सिजन चाहिने अरु बिरामी अस्पतालले भर्ना नगर्ने जानकारी दिइएको हो ।

अहिले अस्पतालमा उपचार गराइरहेका बिरामीलाई पनि अक्सिजन नहुँदा कठिनाइ आएको अस्पतालका अध्यक्ष विष्णुराज कार्कीले बताउनुभयो ।

यस्तै, काठमाडौंको गोकर्णेश्वर नगरापालिकामा रहेको नेपाल मेडिकल कलेजले मंगलबार एक सूचना प्रकाशित गरी अक्सिजन उपलब्ध नभएकोले भर्ना भएका बिरामीलाई ‘आ–आफ्नो व्यवस्था गर्न’ भनेको छ ।

पर्याप्त अक्सिजन नपाएपछि राजधानी लगायत देशका विभिन्न भागमा सञ्चालित अस्पतालहरुले कोरोना संक्रमितको उपचार गर्न नसकिने भन्दै हात झिक्न थालेका छन् ।