काभ्रेपलाञ्चोक । नेपाल भ्रमण वर्षलाई लक्षित गरी काभ्रेका होमस्टेहरूले पर्यटकलाई छुटको अफर ल्याएका छन् । भ्रमण वर्षमा पर्यटकलाई आकर्षित गर्नका होमस्टे एसोसिएसन नेपाल (होसान)ले पर्यटकलाई खाना र आवासका लागि २० प्रतिशत छुट दिने भएका हुन् ।
यसअघि होटल संघ नेपाल (हान)ले पर्यटकलाई कोठामा ३० प्रतिशत र खानामा १५ प्रतिशत छुट दिने घोषणा गरेको थियो । उनीहरूले सरकारको अभियानमा साथ दिन तथा घरवासलाई प्रवद्र्धन गर्ने उद्देश्यले पर्यटकलाई खाना र आवासका लागि २० प्रतिशत छुट दिने निर्णय गरेको हो ।
होसानका अनुसार हाल देशका ५७ जिल्लामा घरवास सञ्चालनमा छन् । होसानले घरवासमा आउने पर्यटकका लागि उपलब्ध भएसम्म प्रत्येक साँझ सांस्कृतिक कार्यक्रमले मनोरञ्जन दिने समेत योजना बनाएको छ । यस्तै, पर्यटकलाई आकर्षित गर्न स्थानीय कृषि उपजलाई नै होमस्टेमा प्रयोग गरिनेछ ।
ग्रामीण भेगका बासिन्दाको स्वरोजगारका अवसर सिर्जना हुने तथा आम्दानी वृद्धिको माध्यमबाट जीवनस्तरमा सुधार ल्याउने प्रकृतिका ग्रामीण पूर्वाधारको दिगो विकास गर्न नेपालमा २०६७ देखि घरवास पर्यटन सुरू गरिएको थियो ।
