काठमाडौं । स्वास्थ्य तथा जनसंख्या मन्त्रालयले भारतबाट तत्काल खोप नआउने बताएको छ । शुक्रबार स्वास्थ्य मन्त्रालयका प्रवक्ता जागेश्वर गौतमले विज्ञप्ति प्रकाशित गरी भारतसँग भएको सम्झौता अनुसार बाँकी खोप तत्काल आउन नसक्ने बताउनुभएको हो ।
तत्काल ५० लाख मात्रा कोभिसिल्ड खोप खरिद गर्ने अवस्था नरहेको विज्ञप्तिमा उल्लेख छ । औषधि व्यवस्थापन विभागको आपतकालिन प्रयोगका लागि अनुमति प्राप्त कोभिशिल्ड खोप २० लाख डोज ४ डलरका दरले खरिद गर्ने भनिए पनि १० लाख डोज मात्रै प्राप्त भएको छ।
बाँकी खोप वर्तमान विश्व परिस्थिति र भारतको अवस्थाले तत्काल नआउने देखिएको मन्त्रालयले जनाएको छ ।
सेरम इन्सटिच्युट इन्डियाले नेपाललाई खोप आपूर्ति गर्नु आफ्नो प्राथमिकता रहेको बताए पनि कम्पनीमा भएको आगलागी र क्षमता विस्तारमा अवरोध भएकाले खोप आउन ढिलाइ हुने भएको हो।
अन्य कम्पनीका खोप औषधि व्यवस्थापन विभागबाट स्वीकृति पाएको र पाउने क्रममा रहेको मन्त्रालयले जनाएको छ । यस्त, मन्त्रालयले खोप सम्बन्धमा मन्त्रालयलाई संलग्न गरी आएका समाचारमा सत्यता नरहेको पनि दाबी गरेको छ ।
