काठमाडौं । दाङको तुलसीपुर उपमहानगरपालिका वडा नं ६ गाइडर टोलका शिक्षक ऋषिकेश केसीको निधन भएको छ । करिब ४२ वर्षीय केसीको राप्ती स्वास्थ विज्ञान प्रतिष्ठान घोराहीमा उपचारको क्रममा गएराति निधन भएको राष्ट्रिय जनमोर्चा दाङका अध्यक्ष गणेश आचार्यले जानकारी दिनुभयो ।
कोरोनाको लक्षण देखिएपछि केसीलाई उपचारका लागि हिजै अस्पताल लगिएको थियो । उहाँको उपचारकै क्रममा बिहान ३ बजे निधन भएको हो ।
राष्ट्रिय जनमोर्चा समर्थक केसी स्थानीयस्तरमा सामाजिक क्षेत्रमा सक्रिय हुनुहुन्थ्यो । केसीको निधनले लोकप्रिय शिक्षक तथा सामाजिक अगुवा गुमाएको आचार्यले बताउनुभयो ।
यसैबीच नेपाल कम्यूनिष्ट पार्टी (मसाल) दाङले केसीको निधनप्रति गहिरो दुः व्यक्त गरेको छ । उहाँ पार्टीको तुलसीपुर उपमहानगरपालिका ६ नं वडा कमिटीका पूर्वसेक्रेटरी रहेको जानकारी दिँदै जिल्ला प्रवक्ता भरत भण्डारीले ‘पार्टीको नीति, सिद्धान्तप्रति प्रतिबद्ध, दृढ, अनुसासित र समाजसेवी व्यत्तित्व केसीको निधनले पार्टीलाई गम्भीर क्षति पुगेको’ बताउनुभएको छ ।
शोक वक्तव्यमा भनिएको छ,
‘नेपाल कम्यूनिष्ट पार्टी (मसाल) का पार्टी सदस्य तथा तुलसीपुर उपमहानगरपालिका वार्ड नं. ६ वार्ड समितिका सदस्य एवं पूर्ववार्ड सेक्रेटरी का. ऋषिकेश केसी (शब्दकोष) को आज मिति २०७८ वैसाख २४ गते रातिको ३ बजे राप्ती स्वास्थ विज्ञान प्रतिष्ठान घोराहीमा उपचारको क्रममा भएको निधनले हामीलाई अत्यन्तै दुःखी र मर्माहत बनाएको छ । उहाँ विगत लामो समय देखि पार्टीका विभिन्न मोर्चाहरुमा सक्रियतापूर्वक काम गर्दे आउनु भएको थियो । पार्टीको नीति, सिद्धान्त प्रति प्रतिबद्ध, दृढ, अनुसासित र समाजसेवी व्यत्तित्व का. ऋषिकेश केसीको निधनले पार्टीलाई गम्भिर क्षति पुगेको छ । हामी का. ऋषिकेश केसी (शब्दकोष) प्रति हार्दिक श्रद्धाञ्जली र शोक सन्तब्ध परिवारमा भावपूर्ण समवेदना प्रकट गर्दछौं ।’
प्रवक्ता
का. भरत भण्डारी
नेकपा (मसाल)
जिल्ला समिति दाङ
