धनगढी । राष्ट्रिय जनमोर्चाका नेता हरिकृष्ण पाण्डेलाई मातृशोक परेको छ । पाण्डेकी आमा जयकौरा पाण्डेको ८३ वर्षको उमेरमा शनिबार निधन भएको छ ।
केही दिनअघि देखि अस्वस्थ हुनुभएकी जयकौराका धनगढीस्थित सेती प्रादेशिक अस्पतालमा उपचारका क्रममा निधन भएको हो । उहाँको हिजै गोदावरीघाटमा अन्त्येष्टि गरिएको छ ।
राष्ट्रिय जनमोर्चाका नेता कार्यकर्ताको संरक्षणमा महत्वपूर्ण योगदान दिनुभएकी आमा जयकौराको शवमा राजमोले सम्मानका साथ पार्टीको झण्डा ओढाएको थियो । गोदावरीघाटमा आयोजित शोकसभामा राजमोका केन्द्रीय सदस्य नन्दराज भट्टले पार्थिव शरीरमा राजमोको झण्डा ओढाउनुका साथै उहाँको योगदानबारे चर्चा गर्नुभएको थियो ।
राजमो नेता लक्षीरमा आचार्यले सञ्चालन गर्नुभएको कार्यक्रममा अखिल नेपाल युवक संघका महासचिव एवम् मृतकका भतिजा कृष्ण पाण्डेसहित राजमो नेता, कार्यकर्ता तथा आफन्त र स्थानीयले श्रद्धाञ्जली अर्पण गर्नुभयो ।
मातृशोकमा पर्नुभएका राजमो नेता हरिकृष्ण पाण्डेले परम्परागत काजक्रिया नगर्ने बताउनुभएको छ । उहाँले बाँचुन्जेल बुवाआमाको सेवा गर्नु छोराछोरीको कर्तब्य हो भन्दै आफूले जीवित रहँदा आमालाई सकभर खुशी राख्न प्रयास गरेको र मृत्युपछि गरिने रुढीवादी संस्कारलाई नमान्ने बताउनुभयो ।
मृतक जयकौराको मृत्यु भएको सातौं दिनमा उहाँकै निवासमा श्रद्धाञ्जली सभाको आयोजना गरिने राजमो कैलालीले जनाएको छ ।
